Şýchınskide kafede gaz qospasynyń jarylýynan alty adam qaza tapty
ASTANA. KAZINFORM – Aqmola oblysy Býrabaı aýdanynyń Şýchınsk qalasynda bes qabatty turǵyn úıge japsarlas ornalasqan bir qabatty kafede gaz-aýa qospasy jarylyp, artynsha órt shyqty. Oqıǵa saldarynan alty adam kóz jumdy.
Aqmola oblysy Tótenshe jaǵdaılar departamenti baspasóz qyzmetiniń málimetinshe, habar túskennen keıin bes mınýt ishinde óńirdiń qutqarý kúshteri men quraldary oqıǵa ornyna jetken.
«Órt sóndirýshiler janyp jatqan ǵımarattan 8 gaz ballonyn alyp shyǵyp, 10-nan astam adamdy qutqardy. Aldyn ala derekter boıynsha, oqıǵa saldarynan shamamen 20 adam zardap shekti, alty adam qaza tapty», – dedi Aqmola oblysy TJD resmı ókili Ersaıyn Qoıshybaev.
Qazirgi ýaqytta órt tolyq sóndirilgen. Qutqarýshylar úıindilerdi arshý jumystaryn júrgizip jatyr. Oqıǵanyń sebepteri men mán-jaıy anyqtalýda.
«Aqmola oblysy TJD-da 8 (7162) 514-298 nómiri boıynsha jedel jeli ashyldy. Oqıǵa ornynda TJD basshylyǵy, oblys ákiminiń orynbasary, órt sóndirý bólimsheleri, qutqarý toptary, medıtsınalyq qyzmet pen polıtsııa, gaz-tehnıkalyq ınspektsııa jumys isteýde. Sanavıatsııa men TJM reanımobılderi daıyndyqqa keltirildi», – dep qosty vedomstvodan.
Buǵan deıin Astanada eki qabatty ǵımarat órtengeni habarlanǵan edi.