Shýchınskidegi stýdenttiń ólimi: 10 adamǵa jaza kesildi

ASTANA. KAZINFORM – Aqmola oblysy Býrabaı aýdany sotynyń úkimimen jas jigitti sýıtsıdke ıtermelegen Býrabaı aýdanynyń 11 turǵyny kináli dep tanyldy. 

«Sottalýshylar Býrabaı aýdanynda uzaq ýaqyt boıy (2 jyl ishinde) kúsh qoldanyp, qorqytyp, 12 adamnan 130-500 myń teńgege deıin (jalpy soma 1 140 000 teńge) aqsha bopsalaǵan. Sonymen qatar eki sottalýshy «N» jáne «A» jábirlenýshi «B»-ni ózine qol salýǵa deıin jetkizgen. Sot 7 sottalýshyny 4 jyldan 5 jylǵa deıin merzimge bas bostandyǵynan aıyryp, úsheýine 4 jyldan 5 jylǵa deıin bas bostandyǵyn shektedi. Kámeletke tolmaǵan «Sh.» jábirlenýshilermen tatýlasýyna baılanysty qylmystyq jaýaptan bosatyldy», - delingen sot úkiminde.

Sondaı-aq, sot «N», «K» jáne «T» jetkinshek bolǵandyqtan, al «R» kinásin moıyndap, shynaıy ókingendikten jáne «K», «SA», «T»-nyń buryn sotty bolmaǵandyqtan jazany jeńildetetin jaǵdaı retinde eskergeni aıtyldy. Sottalýshylarda aýyrlatatyn mán-jaılar anyqtalmaǵan.

«Sottalǵandardan jábirlenýshilerdiń paıdasyna jalpy somasy 3 mln teńge kóleminde moraldyq zııan jáne jalpy somasy 1 140 000 teńgege keltirilgen materıaldyq zalal óndirildi. Sonymen qatar basty sot talqylaýy barysynda tártipti buzǵany úshin polıtsııa departamentiniń atyna jáne aýdan ákiminiń atyna jastardy jumyspen qamtý bóliginde jumysty kúsheıtýge nazar aýdara otyryp, jek qaýlylar shyǵardy», - deıdi Aqmola oblystyq sotynan.

Sot úkimi zańdy kúshine engen joq.

Eske salaıyq, byltyr 7 qazanda Aqmola oblysynda temirjoldan stýdenttiń denesi tabylǵany týraly habarlaǵan edik. 19 jastaǵy stýdent ózine 6 qazanda qol jumsaǵan. 

Prezıdent Şýchınsk qalasyndaǵy stýdenttiń ólimine qatysty isti jeke baqylaýyna aldy. 

Memleket basshysy Іshki ister mınıstrine atalǵan istiń mán-jaıyn jan-jaqty tekserýdi tapsyrdy.

Aıta ketsek, Shýchınskidegi kolledj stýdentiniń ólimine qatysty is sotqa byltyr 6 jeltoqsanda joldanady.