Şýchınsk qalasyndaǵy oqıǵany tergeıtin komıssııa quryldy — TJM
BÝRABAI. KAZINFORM — Tótenshe jaǵdaılar mınıstri general‑leıtenant Shyńǵys Árinovtiń buıryǵymen Aqmola oblysynyń Şýchınsk qalasynda bolǵan tótenshe oqıǵanyń sebepterin anyqtaý jónindegi vedomstvoaralyq komıssııa quryldy. Bul týraly vedomstvonyń baspasóz qyzmeti málim etti.
Komıssııaǵa TJM basshysy tóraǵalyq etedi. Onyń quramyna Іshki ister, Densaýlyq saqtaý, Eńbek jáne halyqty áleýmettik qorǵaý, Energetıka, Ónerkásip jáne qurylys, Ádilet, Saýda jáne ıntegratsııa mınıstrlikteriniń basshylyǵy, sondaı-aq Aqmola oblysy ákimdiginiń ókilderi kirdi.
— Komıssııaǵa oqıǵanyń sebepterin jan-jaqty, tolyq jáne obektıvti tergeýdi qamtamasyz etip, uqsas jaǵdaılardyń qaıtalanýyna jol bermeý úshin qajetti uıymdastyrýshylyq jáne aldyn alý sharalaryn ázirleý tapsyryldy, — delingen habarlamada.
Zardap shekken adamdarǵa jáne qaıtys bolǵan adamdardyń otbasylaryna medıtsınalyq jáne psıhologııalyq qoldaýdy qosa alǵanda, barlyq qajetti kómek kórsetiletin bolady. Aqmola oblysynyń ákimdigine qaıtys bolǵan adamdardy jerleýdi uıymdastyrýǵa kómek kórsetý tapsyryldy.
Qolda bar aqparatqa sáıkes Şýchınsk qalasynda bes qabatty turǵyn úıge irgeles salynǵan bir qabatty dámhanada gaz‑áýe qospasynyń jarylýynan keıin órt shyqqan bolatyn.
Aqmola oblysy Tótenshe jaǵdaılar departamentiniń bólimsheleri habar alǵannan keıin bes mınýt ishinde oqıǵa ornyna jetti.
— Avarııalyq-qutqarý jumystary barysynda árqaısysynyń kólemi 50 lıtrlik bes gaz ballony jáne eki ottegi ballony órtten shyǵaryldy, bul jarylystardyń qaıtalanýyna jol berilmedi. Órt sóndirýshiler órtenip jatqan úı-jaıdan 10 adamdy qutqardy, — dep habarlady TJM baspasóz qyzmetinen.
Oqıǵa saldarynan 28 adam zardap shekti, olardyń 13-i aýrýhanaǵa jatqyzyldy, 8 adamǵa medıtsınalyq kómek kórsetilgennen keıin úılerine jiberildi. 7 adam kóz jumdy.
Aqmola oblysynyń Tótenshe jaǵdaılar departamentinde jedel jeli jumys isteıdi: 8 (7162) 51-42-98.
— Qazaqstan Respýblıkasynyń Tótenshe jaǵdaılar mınıstrligi qaıtys bolǵan adamdardyń týystary men jaqyndaryna kóńil aıtady, — dep habarlady vedomstvodan.
Eske sala keteıik, buǵan deıin Şýchınskidegi kafede gaz qospasy jarylǵany jóninde jazǵanbyz.
Sonymen qatar, jarylystan zardap shekken 5 adam Kókshetaý aýrýhanasyna aýystyrylǵanyn habarlaǵanbyz.
Sondaı-aq jarylysqa baılanysty qylmystyq is qozǵaldy.
Şýchedegi jarylysta qaza tapqandardyń otbasyna 2 mln teńgeden beriletini habarlandy.