Şýchınsk kafesindegi jarylys: úsh sottalýshyǵa sot úkimi shyqty
ASTANA. KAZINFORM — Býrabaı aýdandyq sotynda Şýchınsk qalasyndaǵy «Tsentr plova Loft» kafesinde bolǵan jarylysqa qatysty is boıynsha úkim jarııalandy. Tótenshe jaǵdaı saldarynan 12 adam qaza taýyp, 11 adam zardap shekken edi.
Eske salaıyq, sotta úsh sottalýshy boldy. Olar – kafeni jalǵa alýshy, avtogaz quıý stantsııasynyń dırektory jáne gaz ballondaryn jetkizýshi.
Sottaǵy sońǵy sózinde kafeni jalǵa alýshy Aqmola oblysynyń turǵyndaryna birneshe jyl boıy kórsetken kómegi týraly aıtty. Qaıǵyly oqıǵadan keıin de zardap shekkenderge kómek kórsetkenin atap ótti. Jaralanǵandar júginetin arnaıy ortalyq ashqanyn, táýlik boıy baılanysta bolǵanyn, aýrýhanaǵa dári-dármek jetkizgenin eske saldy.
– Sot talqylaýy barysynda meniń kinám kafeniń qyzmetin tıisti deńgeıde baqylamaǵanymda, atap aıtqanda, órt qaýipsizdigi talaptarynyń saqtalýyn qadaǵalamaǵanymda ekenin túsindim. «Tsentr plova» mekemesiniń barlyq qujattary men jumysyn basqarýshyǵa senip tapsyrdym, óıtkeni onyń jaýapkershiligine úmit arttym. Bolǵan jaǵdaı úshin barshańyzdan keshirim suraımyn. Buǵan shyn júregimmen ókinemin. Zardap shekkenderdiń eshqaısysyn nazardan tys qaldyrmaı, kómektese beremin, – dedi ol.
Avtojanarmaı quıý stantsııasy dırektory da sońǵy sózinde jábirlenýshilerden keshirim surady. Alaıda sot qaraýy nátıjesin tilge tıek etti. Onyń sózinshe, syrtqy áser saldarynan gaz ballony jarylyp, órt sodan shyqqqan.
– Barlyq sarapshy men maman sot zalynda tipti shamadan tys toltyrylǵan ballonnyń ózi tek syrtqy jylý áserinen ǵana jarylýy múmkin ekenin aıtty... 25 aqpanda «Sherol» avtojanarmaı quıý stantsııasynda turmystyq gaz ballondaryn toltyrý faktisi 26 aqpanda «Tsentr plova» kafesinde shyqqan órtke sebep bolǵan joq, – dep túsindirdi er adam. Ol sottan ózin aqtaýdy surady.
Al gaz ballondaryn jetkizýshi qysqa ǵana sóılep, sottan bolǵan jaǵdaıǵa ádil ári zańdy baǵa berýdi ótindi.
Býrabaı aýdany prokýrorynyń orynbasary Nursultan Dosbolov kafeni jalǵa alýshy men avtojanarmaı quıý stantsııasy ıesine jeti jyl, al gaz jetkizýshige alty jyl bas bostandyǵynan aıyrý jazasyn taǵaıyndaýdy surady.
Býrabaı aýdandyq sotynyń sýdıasy Ásel Іlııasova úkimdi jarııalady.
Kafeni jalǵa alýshynyń áreketi QR Qylmystyq kodeksiniń 292-baby 3-bóligi boıynsha (órt qaýipsizdigi talaptaryn saqtaýǵa jaýapty adamnyń olardy buzýy saldarynan abaısyzda aýyr zardaptarǵa, adamnyń densaýlyǵyna aýyr zııan keltirýge, sondaı-aq ekiden astam adamnyń ólimine ákep soǵý) saralandy. Ol jeti jylǵa bas bostandyǵynan aıyryldy. Sonymen qatar, kásipkerge úsh jyl boıy qoǵamdyq tamaqtaný salasynda qyzmet etýge tyıym salyndy.
Avtojanarmaı quıý stantsııasy dırektory QR Qylmystyq kodeksiniń 306-baby 3-bóligi (tutynýshylardyń ómiri men densaýlyǵynyń qaýipsizdik talaptaryna saı kelmeıtin qyzmet kórsetý, sonyń saldarynan abaısyzda ekiden astam adamnyń densaýlyǵyna zııan keltirý, sondaı-aq adamnyń ólimine ákep soǵý) boıynsha sottaldy. Oǵan da jeti jylǵa bas bostandyǵynan aıyrý jazasy taǵaıyndaldy.
Gaz ballondaryn jetkizýshi QR Qylmystyq kodeksiniń 306-baby 3-bóligi boıynsha kináli dep tanylyp, alty jylǵa bas bostandyǵynan aıyryldy.
Sondaı-aq, sot jábirlenýshilerdiń azamattyq talap-aryzdaryn ishinara qanaǵattandyrdy. Ár jábirlenýshige 1 mıllıonnan 4 mıllıon teńgege deıin ótemaqy tóleý belgilendi.
Úkimge 15 táýlik ishinde shaǵym berýge bolady.
Aıta keteıik, buǵan deıin Şýchınskide kafede gaz qospasy jarylǵanyn jazǵanbyz.
Sonymen qatar, Şýchınskidegi jarylysta oqıǵa qalaı órbigenin túsindirgenbiz.
Al Şýchınskidegi órtten qaza tapqandardyń otbasyna 2 mln teńgeden tólendi.
Odan bólek, Şýchınskidegi qaıǵyly oqıǵadan keıin ákimdik gaz ballondaryn tekserýdi kúsheıtti.
