Şýchedegi «Palaý ortalyǵynda» órtten qaza tapqandar sany 12 adamǵa jetti
ASTANA. KAZINFORM — Astanadaǵy Ulttyq shuǵyl medıtsınany úılestirý ortalyǵynda em alyp jatqan taǵy bir zardap shegýshi kóz jumdy, dep habarlaıdy Kazinform agenttiginiń tilshisi.
Densaýlyq saqtaý mınıstrliginiń baspasóz qyzmetiniń málimetinshe, Şýche qalasyndaǵy «Palaý ortalyǵy» kafesindegi órt kezinde zardap shekken taǵy bir adam esin jımastan jansaqtaý bóliminde qaıtys bolǵan.
Er adam Astanadaǵy Ulttyq shuǵyl medıtsınany úılestirý ortalyǵynda em qabyldaǵan jáne onyń jaǵdaıy asa aýyr bolǵan: órt kezinde joǵarǵy tynys joldary qatty zaqymdanǵan.
Aqmola oblysy Býrabaı aýdany ákimdiginiń baspasóz qyzmeti patsıentterdiń jaǵdaıy baqylaýda ekenin málimdedi.
— Qaıtys bolǵan adamnyń týǵan-týystaryna jan-jaqty kómek kórsetiledi, onyń ishinde jerleý rásimin uıymdastyrý da bar. Bul iske «Palaý ortalyǵy» kafesi men ákimdik te qatysady. Jerleý sharalaryn uıymdastyrý jumystary bastalyp ketti, — delingen habarlamada.
Eske sala keteıik, 26-27 aqpanǵa qaraǵan túni Şýche qalasyndaǵy kafede gaz ballony jarylǵan bolatyn. Sol kezde alty adamnyń qaza tapqany habarlanǵan.
Keıin qurbandar sany toǵyzǵa jetti. Odan soń jansaqtaý bóliminde jatqan taǵy eki adam kóz jumdy. Sondaı-aq jarylys pen órtten zardap shekken bes adam Astanaǵa jetkizilgeni habarlanǵan. Olardyń tórteýi Ulttyq shuǵyl medıtsınany úılestirý ortalyǵyna ushaqpen, taǵy biri jerústi kóligimen jetkizilgen.
Atalǵan oqıǵa boıynsha qylmystyq is qozǵaldy. Sonymen qatar «Palaý ortalyǵy» kafesiniń ıesi ustalǵany belgili boldy.
4 naýryzda ol eki aıǵa qamaýǵa alyndy. 17 naýryzdaǵy jaǵdaı boıynsha Aqmola oblysyndaǵy statsıonarlarda úsh patsıent áli de em qabyldap jatyr.
