Şýchedegi órtten zardap shekken taǵy eki adam jansaqtaý bóliminde kóz jumdy

ASTANA. KAZINFORM — Şýche qalasyndaǵy «Palaý ortalyǵy» kafesinde bolǵan órtten toǵyz adam qaza tapty, al alty adam aýrýhanada jatyr, dep habarlaıdy Kazinform agenttigi tilshisi.

Aqmola oblysynyń densaýlyq saqtaý departamentiniń basshysy Narıman Ermek osy qorqynyshty tragedııada qaza tapqandardyń otbasylary men jaqyndaryna kóńil aıtty.

— Ókinishke qaraı, Şýche aýdandyq aýrýhanasynda taǵy eki naýqastyń qaza tapqany týraly qaıǵyra habarlaımyz. Keshe denesiniń 70%-dan astamyn kúıik shalǵan bir naýqas jan tapsyrdy, al búgin biz 85%-dan astam kúıik shalǵan taǵy bir naýqasty joǵalttyq. Bastapqy kúıik jaraqaty men asqynýlary óte aýyr boldy. Medıtsına qyzmetkerleri naýqastardyń ómirin saqtap qalý úshin qoldan kelgenniń bárin jasady. Ókinishke qaraı, reanımatsııalyq sharalar nátıje bermedi, biz eki naýqasty joǵalttyq, — dedi Narıman Ermek.

Qazirgi ýaqytta Şýche aýdandyq aýrýhanasynda taǵy eki naýqas aýyr halde. Tórt naýqas oblystyq kópsalaly aýrýhanada jatyr, olardyń biri ókpeni jasandy jeldetý apparatyna qosylǵan.

Esterińizge sala keteıik, buǵan deıin Şýchınskidegi kafede gaz jarylysynan alty adam qaza tapqany týraly habarlanǵan bolatyn. Keıinirek qaza tapqandar sany jetige jetti.

Gaz jarylysynan keıin bolǵan órtke qatysty qylmystyq is qozǵaldy.