Şýchedegi órt: zardap shekkenderge Eńbekmıni tarapynan qandaı kómek kórsetiledi
ASTANA. KAZINFORM — Qaza tapqandardyń asyraýynda eńbekke qabiletsiz otbasy músheleri bolǵan jaǵdaıda, olardyń otbasylaryna respýblıkalyq bıýdjetten asyraýshysynan aıyrylý jaǵdaıy boıynsha memlekettik áleýmettik járdemaqy taǵaıyndalady, dep habarlaıdy Eńbekmıni baspasóz qyzmeti.
Tótenshe jaǵdaılar mınıstrligi vedomstvoaralyq komıssııa qurdy. Onyń quramyna beıindi mınıstrlikter men memlekettik organdardyń ókilderi, sondaı-aq Aqmola oblysy ákimdiginiń ókilderi engizildi. Komıssııa oqıǵanyń sebepteri men mán-jaıyn anyqtaý boıynsha tergep-tekserý jumystaryn júrgizip jatyr.
— Qaza tapqandardyń asyraýynda eńbekke qabiletsiz otbasy músheleri bolǵan jaǵdaıda, olardyń otbasylaryna respýblıkalyq bıýdjetten asyraýshysynan aıyrylý jaǵdaıy boıynsha memlekettik áleýmettik járdemaqy taǵaıyndalady. Budan bólek, Biryńǵaı jınaqtaýshy zeınetaqy qorynan jerleýge arnalǵan járdemaqy qarastyrylǵan. QR EHÁQM Halyqty áleýmettik qorǵaý salasyndaǵy retteý jáne baqylaý komıtetiniń aýmaqtyq departamenti qyzmetkerleri árbir otbasyǵa tıesili áleýmettik tólemderdi jedel rásimdeý úshin qajetti konsýltatsııalyq qoldaý kórsetedi. Mınıstrlik Şýche qalasyndaǵy qoǵamdyq tamaqtaný ornynda bolǵan jarylys pen órt saldarynan qaza tapqandardyń týǵan-týystary men jaqyndaryna qaıǵyra kóńil aıtady, — delingen habarlamada.
Eske sala keteıik, Býrabaı aýdanynyń Şýchınsk qalasynda turǵyn úıge japsarlas salynǵan bir qabatty kafede gaz-aýa qospasynyń jarylysy bolyp, artynsha órt shyqty. Sońǵy málimetter boıynsha, zardap shekkender sany 28 adamǵa jetti. Olardyń jeteýi qaza taýyp, 10 adam jansaqtaý bóliminde jatyr, qalǵandaryna qajetti medıtsınalyq kómek kórsetilip jatyr.
Budan buryn Şýchedegi jarylysta qaza tapqandardyń otbasyna 2 mln teńgeden beriletini anyqtaldy.
Sonymen qatar, Şýchınskidegi jarylysqa baılanysty qylmystyq is qozǵaldy.