Şýchede 1 ǵasyrlyq aǵash úıler buzylyp, ornyna jańa turǵyn úı salynady
KÓKShETAÝ. KAZINFORM – Şýche qalasynda 1 ǵasyr buryn aǵashtan jasaǵan úıler buzylyp, ornyna 5 qabatty jańa turǵyn úıler salynady.
2023 jyldyń qyrkúıeginde Býrabaı aýdanynyń ákimdigine Tsıolkovskıı kóshesi 13 mekenjaıy boıynsha ornalasqan úıdiń turǵyndary júginip, ózderi turyp jatqan 1924 jyly salynǵan úıdiń apatty jaǵdaıda ekenin aıtqan.
Turǵyndardyń ótinishterin qaraǵan ákimdik eski turǵyn úıdiń ornyna jańa kóppáterli turǵyn úı salýdy qamtıtyn turǵyn úıdi jańartý baǵdarlamasyn qoldaný týraly sheshim qabyldaǵan.
Jobany «TASU company» kompanııasy júzege asyratyn bolady.
«Turǵyndarmen birqatar kezdesýler ótkizip, olardyń baǵdarlamaǵa qatysý sharttary men taraptardyń azamattyq-quqyqtyq qatynastary talqylandy. Barlyq qajetti quqyqtyq rásimder júrgizilgennen keıin bıylǵy jyldyń naýryz aıynda jańa 5 qabatty turǵyn úı keshenin salý úshin tozyǵy jetken ǵımaratty buzý bastaldy. Turǵyn úıdi paıdalanýǵa berýdiń josparlanǵan merzimi osy jyldyń 4-toqsanyna belgilenip otyr. Qurylys aıaqtalǵannan keıin turǵyndar jańa páterlerge kóshiriledi, bul olardyń turǵyn úı jaǵdaılaryn jaqsartýǵa múmkindik beredi», - dep túsindirdi Býrabaı aýdany ákimdiginen.
Aıtýynsha, budan bólek Tsıolkovskıı kóshesi 14 meken-jaıy boıynsha ornalasqan úı turǵyndarynan da ótinish túsken. Bul úıdiń ornyna da jańartý baǵdarlamasyn jalǵastyrý aıasynda jańa kóppáterli úı salynatyn bolady. Ony 2025 jyly júzege asyrý josparlanǵan.
Aıta ketsek, budan buryn Kókshetaýda sý tasqynynan múlkine zııan kelgen 65 adamnan ótinish túskenin jazǵan edik.
