«Shubyryp ne istep júrsińder?»: Baqyt Sársekbaev Parıj Olımpıadasyna barǵan boksshylardy synady

ASTANA. KAZINFORM — Beıjiń Olımpıadasynyń chempıony, boksshy Baqyt Sársekbaev Parıj Olımpıadasyna qatysyp jatqan boksshylardyń ónerine kóńili tolmaıtynyn aıtty.

Boksshy bul týraly Instagram áleýmettik jelisindegi paraqshasynda jazdy.

«Jigitterdiń fızıkasy óte nashar. Ekinshi raýndta tynys alýy qıyndap, rıngte ázer júr. Soqqylary tym az. Serııalyq soqqylar tipti az. Úsh mınýtta qansha soqqy jasaýǵa bolady? Fızıkamen aınalysady dep arnaıy shaqyrtylǵan mamandar qaıda qarap júr? Jalpy ǵylymı top músheleri qaıda? Nege bizdiń boksshylarǵa sharshy alańda dem jetpeı qala beredi? Nege úsh raýndta aıaqqa tura almaıdy? Báriń shubyryp ne istep júrsińder? Sosyn taǵy bir suraǵym bar: árbir boksshy lıtsenzııa alǵannan keıin Olımpıadaǵa deıin neshe jekpe-jek ótkizdi? Praktıka bar ma? Mysaly, men Beıjiń Olımpıadasyna deıin jarty jylda 22 kezdesý ótkizdim. Al bas bapkerge aıtatyn sózim joq», - deıdi Baqyt Sársekbaev.

Aıta keteıik, búgin Parıj Olımpıadasynda bokstan 57 kelige deıin salmaqta synǵa túsken Mahmud Sabyrhan alǵashqy kezdesýinde jeńilip qaldy. Ol ıspanııalyq Hose Kýles Brotostan aılasyn asyra almady.

Sonymen qatar Frantsııa astanasy Parıj qalasynda ótip jatqan Olımpıadada bokstan Qamshybek Qońqabaev (92 keliden joǵary) jarys jolyn aıaqtady.

Aslanbek Shymbergenov alǵashqy kezdesýinde jeńilip qaldy.