Shubattan soýs, sıyrdyń mıynan «zakýska» - Astanalyq aspaz halyqaralyq baıqaýda top jardy
ASTANA. KAZINFORM – Antalıada ótken GASTRO ANTALYA 2025 halyqaralyq baıqaýynda «Jyldyń altyn aspazy» ataǵyna ıe bolǵan qazaqstandyq Eskendir Salyqov jarystyń qalaı ótkenin qandaı taǵamdar usynǵanyn jáne qazaq ashanasynyń ereksheligin qalaı tanystyrǵanyn aıtyp berdi.
Halyqaralyq dodaǵa 38 elden 500-den astam aspaz qatysyp, olardyń jumystaryn 55 kásibı qazy baǵalaǵan. Baıqaý qorytyndysy boıynsha Eskendir Salyqov altyn jáne kúmis medalǵa ıe bolǵan.
– Ótken aı men úshin óte tartysty ótti. Daıyndyqtyń ústinde júrdik, qaı atalymnan júlde buıyratynyn aldyn ala bilý múmkin emes. Sondyqtan barlyǵyna birdeı daıyndaldym, – dedi ol Jibek Joly telearnasynyń «Bugin LIVE» baǵdarlamasynda.
Aspazdyń aıtýynsha, Antalıadaǵy baıqaýǵa shamamen 3 myń adam qatysqan. Qazaqstannan Astanadan úsh aspaz jáne elordadaǵy Qoǵamdyq tamaqtandyrý jáne servıs kolledjiniń komandalyq quramy óner kórsetken. Barlyǵy júldeli oryndarǵa ıe bolǵan.
– Men eki atalymǵa qatystym: balyq taǵamdary jáne modern cuisine – zamanaýı baǵyttaǵy as ázirleý. Bir atalymda 45 mınýttyń ishinde asúıdi daıyndap, eki túrli taǵamdy eki portsııadan usyný kerek. Al kelesi kezeńde 90 mınýtta basytqy (zakýska), ystyq taǵam jáne desert ázirleý talap etiledi. Ýaqytty durys bólý – eń qıyn tusy. Qatelesýge múlde bolmaıdy, – deıdi Eskendir Salyqov.
Onyń aıtýynsha, baıqaýda qatysýshylar taǵam ónimderi men ydys-aıaqty ózderimen birge alyp keledi, uıymdastyrýshylar tek jumys ornyn usynady. Bul aspazdyń jeke stıli men daıyndyǵyn tolyq kórsetýge múmkindik beredi.
– Men jarysta qazaq ashanasyn tanytýǵa tyrystym. Mysaly, shubattan arnaıy soýs jasap, ony ystyq taǵamǵa qostym. Buǵan deıin mundaı tásildi eshkim qoldanbaǵan. Sondaı-aq sıyrdyń mıynan basytqy daıyndap, ony qýyrylǵan tary men batat (tátti kortofel – red.) pıýresimen usyndym. Taǵamdarym qazylar nazaryna ilikti, – deıdi ol.
Eskendir Salyqov azyq-túlik tehnology mamandyǵyn meńgergen, bul salada 13 jyldan beri eńbek etip keledi.
Aıta keteıik, Buǵan deıin Dýbaıdaǵy Woohoo meıramhanasynda retseptterdi «Aıman» atty jasandy ıntellekt ázirleıtini týraly jazǵan edik.