Shubat pen qymyz Qytaıǵa eksporttalady

NUR-SULTAN. QazAqparat – Elimizde qurǵaq shubat pen qymyzdy Qytaıǵa eksporttaǵysy keletin kásipkerler bar. Qytaı tarapynan da bul ónimderge qyzyǵýshylyq joǵary. Bul týraly Dúnıejúzilik standarttar kúnine oraı ótken forýmda aıtyldy, dep habarlaıdy QazAqparat tilshisi.

«Qurǵaq shubatqa keletin bolsaq, Túrkistan oblysynda Golden Camel dep atalatyn úlken ınvestıtsııalyq joba bar. Búgingi forýmda aıtyp ótkenimdeı, ol kompanııanyń ónimderi Qytaı standarttaryna saı», - deıdi «Qazaqstan standarttaý jáne sertıfıkattaý ınstıtýty» RMK bas dırektorynyń orynbasary Erkejan Ámirhanova.

Budan bólek, Qytaıdyń standarttaý organy - sút ónimderi qaýymdastyǵy standarty negizinde ulttyq standartyn jasaýdy qolǵa alǵan.

«Qytaı standartyn qazaqstandyq ónimge qoldanýǵa ruqsat alýymyz kerek boldy. Qajetti qujatty jiberip, ruqsat aldyq. Bul qazaqstandyq kompanııa Qytaıdaǵy sút ónimderi qaýymdastyǵy standartyn qabyldaý quqyǵyn aldy. Búgingi tańda qurǵaq shubat Aýyl sharýashylyǵy mınıstrligi veterınarlyq talaptar boıynsha qol qoıǵan hattamaǵa kirdi. Bul hattama osy ónimdi eksporttaýǵa jol ashady», - deıdi Erkejan Ámirhanova.

Sondaı-aq, Erkejan Maǵaýınqyzy Qytaıda qurǵaq shubatqa qatysty standart joq ekenin aıtty.

«Qymyz – erekshe ónim. Qytaılar bul ónimdi kóp tutyna bermeıdi, biraq búgingi tańda qyzyǵýshylyq artyp keledi. Olarda qymyzǵa qatysty standart joq bolǵandyqtan, ózimizdiń ulttyq standartymyzdy usynyp, qytaı tiline aýdaryp berdik. Odan keıin bul standart Qytaıdyń densaýlyq saqtaý mınıstrliginde talqylanyp, arnaıy zertteýden ótedi», - deıdi ol.

Qytaıdyń densaýlyq saqtaý mınıstriligi tamaq ónimderiniń qaýipsizdigine qatysty qosymsha talaptar qosýdy usynǵan.

«Biz olardyń talabyn oryndadyq, endi jaýap kútip otyrmyz. Olar bizdiń ulttyq standart negizinde qymyzǵa qatysty Qytaıdyń ulttyq standartyn jasaıdy. Tehnıkalyq talaptardy oryndaý óte mańyzdy. Qytaılar úshin qymyzdyń dáminiń aşylyǵy tańsyq dúnıe boldy. Al bul - biz úshin qalypty jaǵdaı», - deıdi Erkejan Ámirhanova.

Avtor: Zarına Qaharman