«SHUBAT FEST-2026»: Aqtaýda shubattyń úzdik óndirýshileri anyqtalady
ASTANA. KAZINFORM - 29 tamyzda Aqtaý qalasyndaǵy Amfıteatr alańynda «SHUBAT FEST-2026» ulttyq shubat festıvali ótedi.
Mańǵystaý oblysynyń ákimdigi uıymdastyratyn festıval Qazaqstandaǵy úzdik shubat óndirýshilerin anyqtaýǵa, dástúrli sýsyndy dáripteýge jáne túıe sharýashylyǵy ónimderin tanymal etýge baǵyttalǵan.
Festıval Týrızm jáne sport mınıstrligi bekitken 2026 jylǵy respýblıkalyq týrıstik is-sharalar kúntizbesine engizilgen jáne Ulttyq oqıǵalar kúntizbesiniń negizgi is-sharalarynyń qataryna kiredi. Bul onyń elimizdiń týrıstik áleýetin ilgeriletýdegi joǵary mártebesin aıqyndaıdy.
Festıval aıasynda shubattyń úzdik óndirýshisin anyqtaıtyn negizgi konkýrs ótedi. Sonymen qatar túıe sútinen jasalǵan qurt, balqaımaq, desert, balmuzdaq jáne túıe súti qosylǵan kofe men kokteıl sııaqty ónimder boıynsha arnaıy nomınatsııalar uıymdastyrylady.
Konkýrsqa túıe sharýashylyǵy ónimderin óndiretin jeke jáne zańdy tulǵalar, sharýa jáne fermer qojalyqtary qatysa alady. Fınalǵa 20 qatysýshy irikteledi. Olardyń shubat úlgileri sapa men qaýipsizdik kórsetkishterin anyqtaý úshin táýelsiz akkredıttelgen zerthanaǵa jiberiledi.
Negizgi konkýrs jeńimpazdary úsh baǵyt boıynsha jıyntyq ball negizinde anyqtalady: halyqtyq daýys berý – 20%, táýelsiz zerthananyń qorytyndysy – 40%, kásibı qazylar alqasynyń baǵasy – 40%. Ónimniń fızıkalyq-hımııalyq jáne mıkrobıologııalyq kórsetkishteri, dámi, konsıstentsııasy, hosh ıisi men usynylýy baǵalanady.
Negizgi konkýrstyń júldegerlerine 1 mln, 700 myń jáne 500 myń teńge kóleminde aqshalaı syılyqtar qarastyrylǵan. Al Gran-prı ıegerine avtokólik tabystalady. Arnaıy nomınatsııalar boıynsha da aqshalaı júldeler beriledi.
Festıvaldiń fınaldyq baǵdarlamasynda gala-kontsert ótkizilip, tanymal estrada juldyzdarynyń óner kórsetýi josparlanǵan. Sonymen qatar halyqtyq daýys berý uıymdastyrylady. Uıymdastyrýshylardyń boljamynsha, sharaǵa 20–25 myń kórermen qatysady.
-«SHUBAT FEST-2026» shubatty ulttyq gastronomııalyq brend retinde tanytýǵa, otandyq túıe sharýashylyǵyn qoldaýǵa jáne Mańǵystaýdyń gastronomııalyq týrızmdegi áleýetin arttyrýǵa baǵyttalǵan,-delingen habarlamada.
Osyǵan deıin elimizde qymyz ben shubat óndirisi 37 paıyzǵa azaıǵany týraly jazdyq.
