Shubarkól mańynda teplovoz ben júk kóligi soqtyǵysty
QARAǴANDY. QazAqparat – Qaraǵandy oblysy Shubarkól kentiniń mańynda Arqalyq -Shubarkól ýchaskesiniń Nurdala – Dorojnyı aralyǵynyń temirjol ótkelinde teplovoz ben KamAZ soqtyǵysty. Qaza bolǵandar men zardap shekkender joq, dep habarlaıdy QazAqparat tilshisi.
2021 jylǵy 1 sáýirde 08.20-da Qostanaı bóliminiń Arqalyq - Shubarkól bir joldy ýchaskesiniń Nurdala – Dorojnyı aralyǵynyń kúzetilmeıtin retteletin temirjol ótkelinde teplovoz ben KamAZ júk kóliginiń soqtyǵysýy oryn aldy.
«Ýchaske boıynsha 60 km/saǵ jyldamdyqpen (osy ýchaskede ornatylǵan 70 km/saǵ) jol júrip kele jatqan lokomotıv mashınısi, temirjolǵa shyǵyp ketken avtomobıldi kórgen. Alaıda júrgizýshi berilgen sıgnaldarǵa jaýap bermegen. Mashınıst jedel tejeýdi basqan, biraq qashyqtyqtyń azdyǵyna baılanysty soqtyǵysýdyń aldyn alý múmkin bolmady. JKO nátıjesinde teplovoz relsten shyǵyp ketip, bir búıirine aýdarylǵan. Qaza bolǵandar men zardap shekkender joq. Joldyń zaqymdanbaǵan. Oqıǵa poıyzdardyń keshigýine áser etken joq», - dep habarlady «QTJ» AQ baspasóz qyzmeti.
Oqys oqıǵanyń sebebi kólik júrgizýshisiniń jol qozǵalysy erejelerin buzýy boldy. Ol jaqyndap kele jatqan jyljymaly quramnyń joqtyǵyna kóz jetkizbeı jáne baǵdarshamnyń qyzyl sıgnalyn elemeı, ótkelge shyqqan. Ótkizý dabyly durys jumys istep turǵan.
Foto: www.instagram.com/tilshi_askar
