Shubarkól kómiri myń teńgege arzandady - Erlan Qoshanov
ASTANA. QazAqparat - Qaraǵandy oblysynyń ákimi Erlan Qoshanov Astanada ótkizgen baspasóz máslıhatynda Shubarkóldegi kómir baǵasynyń arzandaǵanyn aıtyp ótti, dep habarlaıdy «QazAqparat» HAA tilshisi.
«Birinshiden aıtarym, oblysta kómir tapshylyǵyna qatysty másele joq. Ótken jyly oblysta 28 mln tonna kómir óndirilse, bıylǵy jyly ol kórsetkishten 2 mln tonna artyq óndire bastadyq. Sondyqtan, kómirge qatysty óńirdiń túkpir-túkpirinde eshqandaı másele joq. Satylyp jatyr», - deıdi oblys ákimi.
Baspasóz máslıhaty barysynda aımaq basshysy sonymen birge kómir baǵasy týraly da aıtyp ótti.
«Shubarkól kómiri boıynsha biz treıderlarmen jumys júrgizip, baǵany myń teńgege arzandattyq. Qazir Qaraǵandynyń alys degen óńirlerinde kómirdiń tonnasy 10 myń teńge turady. Aýdandar boıynsha Shubarkólden qashyqtyǵyna baılanysty shamamen kómirdiń baǵasy 10-11 myń teńge aralyǵynda satylady. Biz kómir tasymalyn arttyrdyq: buryn biz táýligine 120 vagon tıesek, qazirgi tańda 180 vagonǵa deıin tıep jatyrmyz. Tipti keıde bul kórsetkish 192 vagonǵa deıin barady», - deıdi oblys ákimi.
