Shubarkól kómir jumys kentinde sport kesheniniń qabyrǵasy opyrylyp tústi

QARAǴANDY. QazAqparat – Qaraǵandy oblysynyń Nura aýdanynda ornalasqan «Shubarkól kómir» AQ jumysshylar kentinde sport kesheniniń qabyrǵasy qulady. Zardap shekkender joq, dep habarlaıdy QazAqparat tilshisi.

Oqıǵa 25 maýsymda bolǵan. «Shubarkól kómir» AQ vahtalyq kentinde mádenı-sport kesheniniń qabyrǵasy jartylaı qulap túsken. Oqıǵaǵa qyzmetkerler kýá bolady. Bul kezde ǵımarat jóndeýden ótkizilip jatqandyqtan, keshenniń ishinde eshkim bolmaǵan.

«Kásiporyn qyzmetkerleri de, ǵımaratty qaıta qurýdy júzege asyratyn merdiger uıymnyń ókilderi de zardap shekken joq. Oqıǵanyń sebepteri anyqtalyp jatyr», - dep habarlady «Shubarkól kómir» AQ baspasóz qyzmeti.

Kompanııa ókilderiniń aıtýynsha, ǵımarat 1989 jyly salynǵan. «Tsentralnyı» kenishiniń aýmaǵynda ornalasqan bul mádenı-sport keshenin jóndeý jumystary sáýir aıynda bastaldy. Keshendi qaıta qurý arqyly búkil ǵımaratty qalpyna keltirý josparlanǵan.

«Ázirge kompanııa qyzmetkerleriniń bos ýaqytyn uıymdastyrý úshin vahtalyq kentte 2019 jyly salynǵan ashyq fýtbol alańy men vorkaýtpen aınalysýǵa arnalǵan alań bar», - dep málimdedi kompanııa ókilderi.