Shubar aýylyndaǵy 400-den astam turǵyn úı tabıǵı gaz jelisine qosyldy
ASTANA. KAZINFORM – Memleket basshysy Qasym-Jomart Toqaevtyń aýyl halqynyń ómir súrý sapasyn arttyrý jáne eldi mekenderdi gazdandyrý jónindegi tapsyrmalaryn iske asyrý aıasynda Shubar aýylynda tabıǵı gazben jabdyqtaý júıesiniń iske qosylý saltanaty ótti.
Іs-sharaǵa Aqmola oblysynyń ákimi Marat Ahmetjanov pen «QazaqGaz» ulttyq kompanııasy» AQ basqarma tóraǵasy Sanjar Jarkeshov qatysty.
Uzyndyǵy 74,2 shaqyrymdy quraıtyn gaz qubyry jobasyn Tselınograd aýdanynyń qurylys bólimi júzege asyrdy. Nátıjesinde, Shubar aýylyndaǵy 400-den astam turǵyn úı tabıǵı gaz jelisine qosyldy. Aýyl turǵyndarynyń pikirinshe, jańa deńgeıdegi jaıly jaǵdaı aımaqtyń áleýmettik-ekonomıkalyq damýyna serpin bermek.
– Memleket basshysy alǵa qoıǵan basty mindet – halyqtyń turmys sapasyn jaqsartý. Búgin biz aýyl turǵyndaryn tabıǵı gazben qamtamasyz etip otyrmyz. Bul – júıeli jumysymyzdyń naqty nátıjesi. Bıylǵy jyly oblys kóleminde 12 gazdandyrý jobasy júzege asyrylýda, olardyń ıgiligin 125 myńǵa jýyq adam kóredi, - dedi Aqmola oblysynyń ákimi Marat Ahmetjanov.
Tabıǵı gazǵa alǵashqylardyń biri bolyp Nurbolat pen Aıgerim Bısenbaevtar januıasynyń shańyraǵy qosyldy. Olar óńir basshylyǵyna jáne ulttyq kompanııaǵa kópten kútken jobany júzege asyrǵany úshin alǵysyn bildirdi.
– Bizdiń otbasymyz úshin bul – tarıhı oqıǵa. Endi otyn jınap, kómir tasýdyń qajeti joq. Úıimiz jyly ári jaıly, al bul – kez kelgen otbasy úshin eń mańyzdysy, - dep tilge tıek etti jas otbasy.
Óz kezeginde «QazaqGaz» ulttyq kompanııasy» AQ basqarma tóraǵasy Sanjar Jarkeshov gazǵa qosylý – turǵyndardyń ómir súrý jaǵdaılaryn jaqsartýmen qatar, áleýmettik-ekonomıkalyq damýdyń da negizi ekenin atap ótti.
– «QazaqGaz» ulttyq kompanııasy elimizdiń ár óńirinde joǵary ómir súrý standarttaryn qamtamasyz etý úshin turaqty túrde jumys júrgizip keledi. Bul – halyqtyń ál-aýqaty men ekonomıkanyń ornyqty ósýine baǵyttalǵan mańyzdy qadam, - dedi Sanjar Jarkeshov.
2024–2028 jyldarǵa arnalǵan ınvestıtsııalyq baǵdarlama aıasynda «QazaqGaz Aimaq» AQ-nyń elordalyq óndiristik fılıaly birqatar eldi mekenderde gaz qubyrlaryn salý jumystaryn qarqyndy júrgizip jatyr. Atap aıtqanda, 2025 jylǵy aqpanda Tselınograd aýdanynyń Nurly aýylynda da turǵyndar tabıǵı gazǵa qol jetkizdi.
Aıta keteıik, 2020–2024 jyldar aralyǵynda Aqmola oblysynda 657 shaqyrym gaz qubyry salynyp, paıdalanýǵa berildi. Nátıjesinde 9 656 úı gazben qamtyldy.
Keıingi iri jobalardyń qatarynda – Arshaly aýdanynyń Jibek joly aýylyn gazdandyrý jáne «Saryarqa» magıstraldy gaz qubyrynyń birinshi kezeńi aıasynda 17 eldi mekendi qamtý jumystary bar.
Jaqyn arada elorda mańyndaǵy aýyldardy (Aqqaıyń, Qoıandy, Y.Altynsarın, Qaraótkel, Talapker) men Qosshy qalasy gazben qamtamasyz etiledi. Osy jobalar nátıjesinde 32 975 abonentke nemese shamamen 140 myń turǵynǵa tabıǵı gaz qoljetimdi bolady. Áleýmettik osal toptarǵa tabıǵı gazǵa qosylýǵa 100 AEK-ke deıin materıaldyq kómek kórsetiledi.