Shý turǵyndarynan 300 myń dozadan astam «marıhýana» tárkilendi

TARAZ. QazAqparat – Jambyldyq polıtseıler Shý qalasynyń turǵyndarynan 30 keli esirtki zatyn tapty,-dep habarlaıdy QazAqparat tilshisi.

«Qarasora-2021» respýblıkalyq jedel-aldyn alý is-sharasy aıasynda Jambyl oblysy PD Esirtki qylmysyna qarsy is-qımyl basqarmasynyń qyzmetkerleri Shý aýdanynyń qumdy aımaǵynda jedel-izdestirý is-sharalaryn júrgizý kezinde 27 jáne 61 jastaǵy jergilikti turǵyndardy ustady. Tintý barysynda olardan jalpy salmaǵy 30 kelige jýyq «marıhýana» esirtki zaty tabylyp, tárkilendi. Alynǵan esirtki zatynyń salmaǵy 300 myń dozadan asady. Qara naryqta esirtkiniń mundaı mólsheriniń quny-shamamen 3 mıllıon teńge bolady.

«Qazaqstan Respýblıkasy Qylmystyq kodeksiniń 296-baby 4-bóligi (Asa iri mólsherde esirtki zattaryn zańsyz saqtaý) boıynsha sotqa deıingi tergeý amaldary bastaldy. Atalǵan qylmysty jasaǵany úshin 3 jyldan 7 jylǵa deıingi merzimge bas bostandyǵynan aıyrý túrindegi jaza qarastyrylǵan», - dedi Jambyl oblysynyń Polıtsııa departamenti Esirtki qylmysyna qarsy is-qımyl basqarmasynyń bastyǵy polıtsııa polkovnıgi Asqar Jumabekov.

Ustalǵandar kinásin tolyq moıyndap, Shý qalasynyń ýaqytsha ustaý ızolıatoryna qamaqqa alyndy.