Shý ózeniniń bekinisin nyǵaıtyp, Kóksaı ózeniniń arnasyn Qazaqstan aýmaǵyna kóshirý qajet - depýtat Q. Ýálı
ASTANA. Qazannyń 13-i. QazAqparat /Qanat Mámetqazyuly/ -Búgin QR Parlamenti Májilisiniń jalpy otyrysynda depýtat Qurmanǵalı Ýálı Úkimet basshysyna depýtattyq saýal joldady. Onda depýtat Jambyl oblysyndaǵy Shý ózeni jaǵalaýy bekinisin nyǵaıtý, Teris-Aşybulaq sý qoımasyn qaıta jańǵyrtý jáne Kóksaı ózeni arnasyn Qazaqstan aýmaǵyna kóshirý máselelerin kóterdi.
«2006 jyldan beri Jambyl oblysynyń Qordaı jáne Shý aýdandary arqyly ótetin Shý ózeniniń sý aǵystarynyń ózgerip, jaǵalaýlardyń shaıylyp ketý úrdisteri jıi oryn alyp júr. Ásirese, qazaq jerin qyrǵyz eliniń paıdasyna aıyryp berilýine baılanysty shekara syzyǵynyń ózgertilip, shekara baǵanalary men qaýipsizdik belgileriniń shaıylyp ketý saldarynan Qyrǵyz Respýblıkasymen shekaralas aımaqtarda kúrdeli jaǵdaılar týyndaýda. Shý ózeniniń jaǵalaýy bekinisin nyǵaıtý sharalaryn iske asyrý maqsatynda ázirlengen jáne memlekettik saraptamadan ótken jobalaý-smetalyq qujattar QR Aýyl sharýashylyǵy mınıstrliginiń Sý resýrstary komıtetine tapsyryldy. Jobanyń somasy Qordaı aýdany boıynsha 6 mlrd. 15 mln. teńgeni, Shý aýdany boıynsha 2 mlrd. 650 mln. teńgeni quraıdy», - dedi depýtat.
Onyń aıtýynsha, taǵy bir apatty nysan bolyp tabylatyn Teris-Aşybulaq sý qoımasy 1963 jyly iske qosylǵan. Nysan arqyly 20 myń gektar egistik alqaby sýǵarylady. Alaıda,
1994 jylǵy esepteýler nátıjesinde atalǵan sý plotınasynyń jer silkinisterine tózimsizdigi týraly qorytyndy berilgen. Soǵan baılanysty sý qoımasynyń mólsheri 108 mln. kýbometrge deıin kemitilipti. «Endigi bir másele - Kóksaı ózeni arnasyn beri kóshirý. Arnanyń 36,5 shaqyrymynyń 12,8 -i Qyrǵyz Respýblıkasynyń aýmaǵynda ornalasqan. Sondyqtan, Qyrǵyz jaǵynan arna bóligin talqandaý arqyly aǵyn sýdy óz betinshe ıelený jaǵdaıy da oryn alýda. Osy jaǵdaıǵa baılanysty arnanyń qyrǵyz jaǵynda ornalasqan bóliginde sý paıdalaný sharalaryn qamtamasyz etý barysynda qıynshylyqtar týyndap otyr», degen depýtat atalǵan sharalarǵa tıisti qarajat bólip, máseleni tıimdi sheshý qajettigin atap ótti.
