Shý qalasynyń turǵynynan 3 000 doza esirtki tárkilendi

TARAZ. QazAqparat – Jambyldyq polıtseıler esirtki satýshydan úsh myńǵa jýyq gashısh dozasyn tárkiledi,-dep habarlaıdy QazAqparat tilshisi.

«Qarasora-2021» respýblıkalyq jedel aldyn alý is-sharasy barysynda Jambyl oblysynyń Polıtsııa departamenti Esirtki qylmysyna qarsy is-qımyl basqarmasynyń qyzmetkerleri «Qaınar-Qordaı» avtojolynda Chevrolet markaly avtokólikti toqtatty. Kólikti tintý kezinde jolaýshy, Shý qalasynyń 44 jastaǵy turǵynynan jalpy salmaǵy eki keli 965 gramm «gashısh» esirtki zaty tabyldy, tárkilengen esirtki zatynyń salmaǵy 3 000 dozany quraıdy. Qara naryqta mundaı esirtkiniń quny shamamen 1,5 mıllıon teńgege aınalady.

«Atalǵan derekke qatysty Qazaqstan Respýblıkasy Qylmystyq kodeksiniń 297-baby 3-bóligi (Esirtki zattaryn ótkizý maqsatynda asa iri mólsherde zańsyz saqtaý) boıynsha sotqa deıingi tergeý amaldary bastaldy. Ustalǵan er adam kinásin tolyq moıyndap, ýaqytsha ustaý ızolıatoryna qamaqqa alyndy», – dedi Jambyl oblysynyń Polıtsııa departamenti Esirtki qylmysyna qarsy is-qımyl basqarmasynyń bastyǵy Asqar Jumabekov.