Shý qalasynyń turǵynynan 100 keli balyq tárkilendi

TARAZ. QazAqparat – Jambyl oblystyq tabıǵatty qorǵaý polıtsııasy qyzmetkerleri Shý aýdany boıynsha profılaktıkalyq is-sharalardy júrgizý barysynda Tasótkel sý qoımasynyń jaǵasynan 47 jastaǵy Shý qalasynyń turǵyny aýlaǵan jalpy salmaǵy 100 kelige jýyq balyqty tárkiledi, dep habarlaıdy QazAqparat tilshisi.

5 qapqa salynǵan ártúrli balyqpen qosa rezeńke qaıyq ta tabylǵan. Er adamnyń aıtýynsha, ol balyq aýlamaǵan, tek satý úshin balyqshylardan satyp alǵan.

Oblystyq polıtsııa departamentiniń habarlaýynsha, er adamǵa balyqty zańsyz satyp alǵany úshin QR ÁQBtK-niń 389-babynyń 1-bóligimen ákimshilik hattama toltyrylyp, materıaldar oblystyq balyq sharýashylyǵy ınspektsııasyna protsessýaldyq sheshim qabyldaý úshin joldanǵan.

Tártip buzýshy memleketke keltirilgen zııandy óteýge, sondaı-aq 10 AEK, ıaǵnı 34 500 teńge kóleminde ákimshilik aıyppul tóleýge mindetteldi.

Aıta keteıik, jalpy, áýesqoı balyq aýlaý tıisti erejelermen egjeı-tegjeıli rettelgen. Balyq aýlaýdyń bul túri aýlanǵan balyqty jeke tutyný úshin ruqsat etiledi. Sondaı-aq balyq aýlaý erejeleri boıynsha balyq aýlaý qarmaqtary, sý astyndaǵy ań aýlaýǵa arnalǵan myltyqtar, torlar, aýlar (1 balyq aýlaýshyǵa 3 danadan aspaıdy) alýǵa bolady, sondaı-aq joldama men ruqsat alý kerek. Joldamalar 7 kúnge deıingi merzimge beriledi. Bul rette bir balyqshyǵa táýligine 5 keliden aspaıtyn balyq aýlaýǵa ruqsat etiledi. Joldamalar nómirlenedi, óıtkeni bul qatań eseptegi qujattar. Joldamaǵa eGov.kz . saıtynda onlaın tapsyrys berýge bolady.

Buǵan deıin Jambyl oblysynda elektrli qarmaqpen balyq aýlaǵan brakonerler ustalǵanyn jazǵan bolatynbyz.