Shý qalasynyń 40 jastaǵy turǵynynan 12 qap marıhýana tabyldy

TARAZ. QazAqparat – Jambyl oblysynda 40 jastaǵy turǵynnyń kóliginen 300 kelige jýyq keptirilgen marıhýana tabyldy, dep habarlaıdy QazAqparat.

Bul týraly oblystyq polıtsııa departamentiniń baspasóz qyzmeti málimdedi.

«Patrýl polıtsııa batalonynyń qyzmetkerleri Birlik-Moıynqum-Ulanbel tas jolynyń 33-shaqyrymynda Shý qalasynyń 40 jastaǵy turǵyny aıdap kele jatqan «Toyota Runner» avtokóligin ustady. Kólikten jalpy salmaǵy 287,5 keli bolatyn 12 qap keptirilgen marıhýana tabylyp, tárkilendi» delingen vedomstvo habarlamasynda.

Qazirgi ýaqytta atalǵan derek boıynsha Qylmystyq kodekstiń 297-baby 3-bóligimen sotqa deıingi tergeý amaldary júrgizilýde. Kúdikti Taraz qalasynyń ýaqytsha ustaý ızolıatoryna qamalǵan.