Shý qalasynda polıtsııaǵa kúsh kórsetkender ustaldy

TARAZ. QazAqparat – Jambyl oblysynda polıtsııa qyzmetkerlerine baǵynbaı, qarsy kúsh kórsetkender ustaldy, dep habarlaıdy «QazAqparat» tilshisi.

«7 mamyrǵa qaraǵan túni Shý aýdandyq polıtsııa bólimine belgisiz adamdar tobynyń tártip saqshylaryna kúsh kórsetip jatqany týraly habarlama túsedi. Polıtsııa qyzmetkeri olardy tynyshtandyrý úshin eskertý oǵyn atýǵa májbúr bolǵan»

, - dep málimdedi oblystyq polıtsııa departamentiniń baspasóz qyzmetinen.

Shý qalasyndaǵy vokzal alańynda patrýldik polıtsııa qyzmetkerleri aldyńǵy memlekettik tirkeý nómiri belgisinsiz júrgen «VAZ-21014» avtokóligin toqtatady.

«Mán-jaıdy anyqtaý barysynda kóliktiń júrgizýshisi men jolaýshylary polıtsııanyń zańdy talaptaryna baǵynbaıdy. Munan soń ózge de tanystarymen birge bılik ókilderine qarsylyq kórsetken»

, - dep túsindiredi vedomstvo.

Atalǵan fakti boıynsha Shý aýdandyq polıtsııa bólimi QR QK 380-baby 1-tarmaǵy «Bılik ókiline qarsy kúsh qoldaný» boıynsha sotqa deıingi tergeýdi bastady.

«Zańbuzýshylyq áreket jasaǵandardyń barlyǵy anyqtaldy. Olarǵa qatysty tergeý-operatıvtik sharalary júrgizilip jatyr. Bılik ókilderine qarsy kúsh qoldanǵan belsendiler QR QPK 128-131 baptary boıynsha ustaldy. Qalǵan málimetter QR QPK 201-babynyń talaptaryna sáıkes tergeý múddesinde jarııalaýǵa jatpaıdy»

, - dep naqtylady oblystyq polıtsııa departamentiniń baspasóz qyzmeti.

Buǵan deıin habarlaǵanymyzdaı, Aqmola oblysynda qyzmettik ıt adam óltirgen kúdiktini ustap berdi.