Shý qalasynda 3 jasar qyzdy zorlaǵan kúdiktiniń isi sotqa jetti
ShÝ. QazAqparat – Jambyl oblysy Shý qalasynda 3 jasar qyzdy zorlaǵan 25 jastaǵy turǵynǵa qatysty eki tomnan turatyn is materıaldary sotqa jetti, dep habarlaıdy QazAqparat tilshisi.
Bul týraly oblystyq qylmystyq ister jónindegi mamandandyrylǵan aýdanaralyq sotynyń baspasóz qyzmeti habarlady.
«2 qazan kúni Jambyl oblysynyń qylmystyq ister jónindegi mamandandyrylǵan aýdanaralyq sotyna Shý aýdany Abaı aýylynda týyp-ósken Dastan Ábdikerimovke qatysty QR QK 120-baby 4-bóligimen qylmystyq is kelip tústi. Kúdikti jábirlenýshiniń dármensiz jaǵdaıyn paıdalanyp, zorlady dep aıyptalýda» delingen habarlamada.
Aıta keteıik, 18 maýsymda Shý qalasynda jantúrshigerlik jaǵdaı bolǵan edi. Kórshilerdiń aıtýynsha, aýlada oınap júrgen búldirshindi kúdikti úıine kirgizip, oıyna kelgenin istegen. Onyń janushyra shyqqan daýysyn estigen kýágerler kómek shaqyrypty. Sol sátte búldirshinniń ákesi bir top adammen kelip, baspananyń esigin buzyp, ishke engen. Alaıda kúdikti terezeden qarǵyp, qashyp ketken. Biraq alysqa uzamaı-aq qolǵa túsken ony turǵyndar polıtsııa kelgenshe baǵanaǵa baılap ustaǵan.
Keıinirek kúdikti Tarazdaǵy tergeý ızolıatoryna jiberildi. Tergeý isin Jambyl oblysy polıtsııa departamenti basshysy men prokýror baqylaýyna alǵan.
