Shý aýdanynda jańa mýzeı paıdalanýǵa berildi

TARAZ. QazAqparat – Jambyl oblysynda Shý aýdanynda jańa tarıhı-ólketaný mýzeı ǵımaraty paıdalanýǵa berildi, dep habarlaıdy QazAqparat.

Mýzeıdiń ashylýynda sóz sóılegen aýdan ákimi Jarylqasyn Aıtaqov, «Parasat», «Qurmet» ordeniniń ıegeri kúıshi-kompozıtor Ábdimomyn Jeldibaev, aýdandyq ardagerler keńesiniń tóraǵasy Qazaqbaı Baıjumanuly mýzeıdiń mańyzdylyǵyna toqtalyp, jańa mádenı nysannyń ashylýymen quttyqtady. Jas býynǵa tárbıe beretin ordaǵa aınalýyna tilek bildirdi.

«Aldyńǵy ýaqyttarda bizderde mýzeı bolǵan. Tilsiz jaýdyń saldarynan qundy jádigerlerdiń birazyn joǵaltyp aldyq. Endi osy jańa mýzeı halyqtyń ıgiligine jarasyn. Mýzeıdiń jádigerlerin jınaýǵa at salysaıyq. Tarıhı qujattardy ardagerlerden jınaqtap jatyrmyz. Osy ardagerler mýzeıdiń tolyǵýyna atsalysatyn bolady», – dedi aýdandyq ardagerler keńesiniń tóraǵasy Qazaqbaı Baıjumanuly.

Atalǵan ǵımarat «Rýhanı jańǵyrý» baǵdarlamasy aıasynda bólingen qarajatqa satyp alynyp, kúrdeli jóndeýden ótken. Atalǵan mýzeı arheologııa, etnografııa, tarıhı kezeńder, Shý óńiriniń tarıhy jáne Táýelsiz Qazaqstan syndy 5 bólimnen turady. Jalpy munda 4 275 jádiger jınaqtalǵan.

Saltanatty sharaǵa jınalǵan aýyl aqsaqaldary, mádenıet qyzmetkerleri, ustazdar men jastar murajaı ishin aralap, eksponattarmen tanysty.