Shý aýdanynda úlken kólemde oq-dári men qarý-jaraq jasyrylǵan oryn tabyldy

TARAZ. QazAqparat – Jambyl oblysynyń Shý qalasyndaǵy qaraýsyz qalǵan ǵımarattyń biriniń jertólesinen úlken kólemde oq-dáriler men qarý jasyrylǵan oryn tabyldy, dep habarlaıdy QazAqparat tilshisi.

Jedel-izdestirý is-sharalaryn oblystyq polıtsııa departamentiniń esirtki qylmysyna qarsy is-qımyl basqarmasynyń qyzmetkerleri júrgizdi. Atalǵan basqarmanyń bastyǵy polıtsııa podpolkovnıgi Álim Bajyqbaevtyń aıtýynsha, 9 qarý men oq-dári, atap aıtqanda, 4 birlik 16 kalıbrli «IJ-ZK» markaly bir oqpandy ańshy myltyǵy, 16 kalıbrli «IJ-17» markaly bir oqpandy sholaq myltyq, 9 mm kalıbrli eki «Baıkal 79-9TM» travmatıkalyq tapanshasy, 5,45 mm kalıbrli patrondardyń 270 birligi, sondaı-aq Qańtar oqıǵasy kezinde polıtsııa departamentiniń qoımasynan urlanǵan 9 mm kalıbrli «PM» tapanshasy tárkilengen.

«Búginde qarýǵa sot-ballıstıkalyq saraptamasy taǵaıyndaldy. Atalǵan derekke qatysty QR Qylmystyq kodeksiniń 287-babynyń 3-bóligi, ıaǵnı, qarýdy, oq-dárilerdi, jarylǵysh zattardy jáne jarylǵysh qurylǵylardy zańsyz satyp alý, berý, ótkizý, saqtaý, tasymaldaý nemese alyp júrý boıynsha sotqa deıingi tergeý amaldary bastaldy», – dedi Álim Bajyqbaev.

Buǵan deıin Іri kólemde esirtki satqan qylmystyq top ustalǵanyn habarlaǵan bolatynbyz.