Shý aýdanynda radıatsııa bar ma?

TARAZ. QazAqparat - Jambyl oblysynyń Shý aýdanynda radıatsııa bar nemese joǵyn anyqtaý maqsatynda mamandar atalǵan aýdanda tekseris júrgizip, nátıjelerimen bólisti, dep habarlaıdy QazAqparat tilshisi.

«Qazaqmys korporatsııasy» JShS baspasóz qyzmetiniń bergen málimetterine súıensek, sarapshylar Shý aýdanynyń topyraq, sý jáne aýasyn teksergen.

Nátıjesinde radıatsııalyq fonnyń artýy joq, al barlyq kórsetkishter norma sheginde nemese normadan áldeqaıda tómen ekeni anyqtalǵan. Sondyqtan «Respýblıkalyq Radıologııalyq Ortalyq» JShS mamandary «Qazaqmys» jergilikti turǵyndarǵa radıatsııalyq zııan keltirmeıdi degen qorytyndy jasaǵan.

Radıologııalyq tekserýdiń júrgizilýine «Qazaqmys» kompanııasy bastamashy bolǵan. Buǵan deıin Shý aýdanyndaǵy mys alpaýytynyń kásiporyndarynda radıatsııalyq fon shamadan asyp ketkendigi jáne zııandy sáýleler jaqyn mańdaǵy eldi mekenderge taralýy múmkin ekendigi týraly aqparat paıda bolǵan. Munyń qanshalyqty shyndyqqa janasatynyn táýelsiz sarapshylar anyqtaýy tıis edi.

Aıta keteıik, tekserý kezinde olardyń janynda ákimdiktiń, «Qazaqmystyń» ókilderi, aýdan depýtattary men aýyl aqsaqaldary bolǵan.

Buǵan deıin Jambyl oblysynda 21 tonnadan asa jabaıy qarasora joıylǵanyn jazǵan bolatynbyz.