Shý aýdanynda mádenı-sporttyq keshen ashyldy
ShÝ. QazAqparat – Búgin oblys ortalyǵynan shalǵaı ornalasqan Shý aýdanyndaǵy Belbasar aýylynda 400 oryndyq mádenı-sporttyq keshen ashyldy, dep habarlaıdy QazAqparat.
Saltanatty sharaǵa oblys ákimi apparatynyń basshysy Rústem Dáýlet qatysyp, oblys ákimi Asqar Myrzahmetovtyń quttyqtaýyn jetkizdi. Sonymen birge Bolat Saýranbaevqa «Oblysqa sińirgen eńbegi úshin» tós belgisin tabys etti.
«Rýhanı jańǵyrý» baǵdarlamasy aıasynda Saýranbaevtar áýletiniń demeýshiligimen boı kótergen nysan oblystyń 80 jyldyǵyna oraı paıdalanýǵa berilip otyrǵan alǵashqy nysan.
Ótken jyly irgetasy qalanyp, qazyǵy qaǵylǵan keshenniń qurylys jumystaryn merdiger «Sheber bıld» jaýapkershiligi shekteýli seriktestigi júrgizgen. Jobalyq quny 500 mıllıon teńgege aınalǵan. Onda búginde 50 adamdy turaqty jumyspen qamtý kózdelýde.
El ıgiligine berilgen zamanaýı mádenı-sport kesheni álemdik standarttarǵa saı salynǵan. Onyń jalpy aýdany 2600-den asa sharshy metr aýmaqty quraıdy. Eki qabatty ǵımaratta shaǵyn fýtbol, basketbol, voleıbol, boks, kúres jáne jattyǵý sektsııalary ornalasqan. Sondaı-aq, onda sportshylar men keshen qonaqtary úshin jabdyqtalǵan býfet-ashana da qarastyrylǵan. Tipti, tórt kabınet, májilis zaly da bar. 100 avtokólikke arnalǵan kólik turaǵy kelýshilerge qolaılylyq týdyratyny sózsiz.
Joba jetekshisi, demeýshi Bolat Saýranbaev bul nysan balalar men jasóspirimderge sportpen tolyqqandy aınalysý arnalǵanyn, sport – densaýlyqty nyǵaıtyp qana qoımaı, minezdi tárbıeleý, tártip pen ózin-ózi jetildirýge serpin beretinin jetkizdi. Sonymen qatar, ol árbir azamat óziniń týǵan eli men jeriniń kórkeıýýine tamshydaı úles qosyp, damýyna atsalysýy perzenttik paryz ekendigin aıtady.
Aıta keteıik, Jambyl oblysynyń 80 jyldyq mereı toıyna oraı 80 nysandy el ıgiligine berý josparlanyp otyr. Bul sport kesheni ashylatyn seksen nysannyń alǵashqysy. Aldaǵy ýaqytta, óńir mereıtoıy qarsańynda birqatar mádenı-tarıhı, áleýmettik nysandardy el ıgiligine berý kózdelýde.
