Shý aýdanynda «Aýyl – el besigi» baǵdarlamasy aıasynda emhana paıdalanýǵa berildi
TARAZ. QazAqparat – Jambyl oblysy Shý aýdanynda jańa emhana paıdalanýǵa berildi,- dep habarlaıdy QazAqparat tilshisi.
Jambyl oblysy Shý aýdanynda «Aýyl – El besigi» jobasy aıasynda júzege asqan aýdandyq ortalyq aýrýhana janynan boı kótergen emhana qurylysy aıaqtalyp, óńirdiń toqsan jyldyq mereıtoıyna oraı paıdalanýǵa berildi. Zaman talabyna saı salynǵan nysan quny 261 mıllıon teńgeni quraıdy. Buǵan deıin turǵyndar úshin aýdandyq ortalyq aýrýhana men dıagnostıkalyq keńes beretin emhananyń qashyqtyǵy seziletin. Endi ol másele osy jańa nysan arqyly oń sheshimin taýyp otyr.
Emhananyń keńes berý-dıagnostıkalyq bóliminde endokrınolog, ýrolog, tis dárigeri, hırýrg, kardıolog, teri-venerolog, juqpaly aýrýlar kabıneti jumys jasaıdy. Atalǵan emhana sońǵy úlgidegi kompıýterlik tehnıkalarmen jabdyqtalaǵan. Sondaı-aq emhana basshylyǵy keler jyly tsıfrlandyrylǵan rentgen apparatynyń alynatynyn jetkizdi.
Jańa nysannyń ashylý saltanatyna qatysqan aýdan ákimi Nurjan Kalenderov pen aýdandyq ardagerler keńesiniń tóraǵasy Qazaqbaı Baıjumanuly aqjarma tilekterin jetkizip, aq halattylardyń jumystaryna sáttilik tiledi.
«Memleket úshin eń basty qundylyq – adamdardyń ómiri men densaýlyǵy. Ekonomıkalyq qıyndyqtyń ornyn ýaqyt óte kele toltyramyz, al adamdardyń ómiri men densaýlyǵyn eshqashan qaıtara almaımyz. Sol sebepti barsha jurtty koronavırýs indetine baılanysty memleket tarapynan atqarylyp jatqan jumystarǵa túsinistikpen qaraýǵa, qoldaýǵa jáne tártip saqtaýǵa shaqyramyn. Ár azamat óz densaýlyǵy úshin birinshi kezekte ózi jaýapty. Atalarymyz «Birinshi baılyq – densaýlyq» dep tegin aıtpaǵan, sol qanatty sóz qazirgi tańda óte ózekti bolyp otyr. Jańa emhana aýdan turǵyndarynyń densalyǵyn arttyrýda súbeli úles qosady dep senemin», – dedi óz sózinde Nurjan Kalenderov.
