Shý aýdanynda 280 kelige jýyq esirtki tárkilendi

TARAZ. QazAqparat - Jambyl oblysynyń polıtseıleri Shý aýdany Belbasar aýylynyń mańyndaǵy qumdy aımaqta ornalasqan «Sarǵaý» ýchaskesinde asa iri mólsherde esirtki zatyn saqtady degen kúdikpen 42 jastaǵy jergilikti turǵyndy ustady, dep habarlaıdy QazAqparat tilshisi.

Esirtkiniń zańsyz aınalymy arnasynyń jolyn kesý boıynsha arnaıy operatsııany oblystyq polıtsııa departamenti esirtki qylmysyna qarsy is-qımyl basqarmasynyń qyzmetkerleri ótkizgen bolatyn.

Іzdestirý is-sharalarynyń nátıjesinde kúdikti ustalǵan ýchaskeden jalpy salmaǵy 237 keli 234 gramm esirtki, qarasora butalary tabylyp, tárkilendi. Turǵylyqty jeri boıynsha saraıdan jalpy salmaǵy 12 keli 640 gramm keptirilgen marıhýana salynǵan polıpropılen qapshyq jáne jalpy salmaǵy 24 keli 586 gramm gashısh esirtki zaty tabyldy.

«Ustalǵan azamat kinásin moıyndap, Shý aýdanynyń ýaqytsha ustaý ızolıatoryna qamaqqa alyndy. Qazirgi ýaqytta osy derekke qatysty QR QK 297-babynyń 3-bóligi, ıaǵnı, esirtki zattaryn asa iri mólsherde ótkizý maqsatynda zańsyz saqtaý boıynsha sotqa deıingi tergeý amaldary bastaldy. Kúdiktige qatysty múlki tárkilenip, 10 jyldan 15 jylǵa deıingi merzimge bas bostandyǵynan aıyrý túrindegi jaza qarastyrylady», – dep habarlady polıtsııa departamenti esirtki qylmysyna qarsy is-qımyl basqarmasynyń bastyǵy polıtsııa podpolkovnıgi Álim Bajyqbaev.

Buǵan deıin Jambyl oblysynda 2,5 tonna esirtki zańsyz aınalymnan shyǵarylǵanyn jazǵan bolatynbyz.