Shýdaǵy júkti áıeldiń ólimi: Aýrýhananyń bas dárigeri qyzmetinen shettetildi
ASTANA. KAZINFORM — Densaýlyq saqtaý mınıstrliginiń komıssııasy Shý aýdandyq aýrýhanasynda júkti áıeldiń qaıtys bolý faktisi boıynsha tekseris júrgizedi.
Jambyl oblysy Shý aýdanyndaǵy ana ólimi faktisi boıynsha Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıteti Shý aýdanynyń emhanasy men aýdanaralyq ortalyq aýrýhanasyna qatysty táýelsiz sarapshylardy tarta otyryp, tekserýdi bastady.
— Tekserý júrgizý kezeńinde Shý aýdanynyń aýdanaralyq ortalyq aýrýhanasynyń bas dárigeri men perzenthana bólimshesiniń meńgerýshisi atqaratyn laýazymdarynan shettetildi. Jambyl oblysy Densaýlyq saqtaý basqarmasy basshysynyń mindetin atqarýshy E. Musabaev tártiptik jaýapkershilikke tartylyp, qatań sógis shyǵaryldy. Medıtsınalyq kómek kórsetýdiń standarttary men qaǵıdalaryn buzýǵa jol bergen basqa adamdarǵa qatysty da jumystan shyǵarýǵa deıin tártiptik sıpattaǵy sharalar qabyldanatyn bolady, — delingen vedomstvo habarlamasynda.
Densaýlyq saqtaý mınıstri Jambyl oblysynyń ákimimen óńirlik bosandyrý qyzmeti jumysynyń sapasyn jaqsartý jónindegi is-qımyl josparyn talqylady. Jambyl oblysynda medıtsınalyq kómek kórsetýdi uıymdastyrýdy jetildirý maqsatynda vedomstvo basshysy Taraz qalasynda vıtse-mınıstr E.Nurlybaevtyń tóraǵalyǵymen ana men bala densaýlyǵyn saqtaý jónindegi úılestirý keńesiniń kóshpeli otyrysyn ótkizýdi tapsyrdy, onyń sheńberinde medıtsınalyq kómektiń qoljetimdiligi men sapasyn jaqsartý boıynsha jedel sharalar ázirleý jospardar bar.
Densaýlyq saqtaý mınıstrliginiń komıssııasy medıtsınalyq kómek kórsetý standarttaryn buzýshylyqtardy joıý maqsatynda Jambyl oblysynyń barlyq bosandyrý uıymdaryna monıtorıng júrgizýge bastamashylyq jasady.
Budan basqa, Shý kópbeıindi ortalyq aýrýhanasynyń perzenthana bólimshesiniń tósekterin akýsherlik-gınekologııalyq kómek kórsetýdi óńirlendirýdiń II deńgeıine sáıkes keletin aýdandyq ortalyq aýrýhana deńgeıine aýystyrý josparlanyp jatyr.
Buǵan deıin Shý aýrýhanasyna júkti bolyp túsken kelinshektiń denesin jubaıy jertóleden tapty degen aqparat taraǵan edi.