Shý alqabynda 1700 keliden astam marıhýana tárkilendi
ASTANA. 26 shilde. QazAqparat - Kóliktik polıtseıler «Kendir-2012» jedel-aldyn alý sharasy kezinde Shý alqabynda 1700 keliden astam jabaıy kendir tárkiledi,
dep habarlady búgin Kóliktegi ІІDniń Esirtki bıznesine qarsy kúres basqarmasynyń bastyǵy Narıman Abylqasenov.
Onyń sózinshe, eń iri partııa 22 shilde kúni alyndy. Dál osy kúni asa iri kólemdegi jabaıy kendirmen esirtki jasaýshyny ustaý múmkin boldy. 38 jastaǵy Jambyl oblysynyń turǵyny 920 keliden astam marıhýana daıyndamaq bolǵan.
«Kúdikti Jambyl oblysy Shý aýdanynyń Shý-Qumózek stansalary aralyǵynyń 3283 shaqyrymynda ustaldy. Er adam esh jerde jumys istemeıdi, osy oblysta turady», - dedi N. Abylqasenov Astanada ótken brıfıngte.
«Kendir-2012» sharasy Shý alqabynda jabaıy kendirdi óndirýshi jáne tasymaldaýshy tulǵalardy anyqtaý maqsatynda júrgizilýde.
Búgingi tańda Kóliktegi Іshki ister departamentimen esirtki bıznesine qatysty 220 qylmys anyqtaldy. Onyń 110 - esirtki satý qylmystary. Jyl basynan beri tárkilengen esirtkiniń jalpy salmaǵy 5 tonna 314 kelini qurady.
