Shtýtgart týrnıri: Elena Rybakına úsh saǵattyq kezdesýdi jeńispen túıindedi
ASTANA. KAZINFORM — Qazaqstannyń birinshi, álemniń 2-raketkasy Elena Rybakına Shtýtgart (Germanııa) WTA 500 týrnıriniń jartylaı fınalyna shyqty.
Jarystyń 1-raketkasy bolyp tirkelgen qazaqstandyq tennısshi shırek fınalda álemdik reıtıngide 25-oryndaǵy kanadalyq Leıla Fernandespen betpe-bet keldi.
Qarsylastar osyǵan deıin ózara tórt ret kezdesken. Esep teń — 2:2.
Bul joly birinshi partııada qazaqstandyq tennısshiniń dop berýdegi qateligin paıdalanǵan Fernandes 4:1 esebimen alǵa shyqty. Rybakına tarazy basyn teńestirgenimen, taı-breıkte kanadalyq sportshy sátti oınady — 7:6 (7:5).
Ekinshi sette esep 2:2 bolǵan mezette Leıla breık jasap, sosyn óz geımin aldy — 4:2. Budan keıin Elena qatarynan tórt geımge qol jetkizdi — 6:4.
Úshinshi, sheshýshi sette de L.Fernandes breıkpen alǵa ketti — 4:2. Biraq esep 5:4 bolyp, dop bergende, matchbolyn paıdalana almady — 5:5. Taı-breıkte Elenanyń asyǵy alshysynan tústi — 7:6 (8:6).
Úsh saǵat 1 mınýtqa sozylǵan tartysty básekede Rybakına 7 eıspen birge 8 breık-poınttyń tórteýin óz esebine jazdy. Fernandes 6 eıs, 3 breıkpen (14 breık-poınt) kózge tústi.
Elena Rybakına fınalǵa shyǵý úshin álemniń 9-raketkasy, reseılik Marııa Andreevamen talasady. Ol shırek fınalda álemniń 4-raketkasy, Polsha ókili Iga Shventekti utyp ketti — 3:6, 6:4, 6:3.
Eske sala keteıik, budan buryn Elena Rybakınanyń Shtýtgart týrnıriniń shırek fınalyna shyqqanyn jazǵan bolatynbyz.
Sondaı-aq 16 jastaǵy qazaqstandyq tennısshi Dýshanbedegi jarysta ozyq shyqty.
