Shtelden ákelinetin dárilerge táýeldilikti azaıtý kerek — Premer-mınıstr
ASTANA. KAZINFORM — Dárilik zattar óndirisiniń tolyq tsıklin jolǵa qoıý strategııalyq mindetke aınalýǵa tıis. Bul týraly Úkimet otyrysynda Premer-mınıstr Oljas Bektenov málim etti.
— Dárilik zattarmen qamtamasyz etý — halqymyzdyń densaýlyǵy men ómirine tikeleı qatysy bar ózekti másele. Sonymen qatar densaýlyq saqtaý júıesiniń turaqty jumysynyń negizgi faktorlarynyń biri. Memleket basshysynyń tapsyrmasyna sáıkes, otandyq farmatsevtıka ónerkásibin damytý, óndiris kólemin ulǵaıtý jáne shyǵarylatyn dári-dármek túrleriniń aýqymyn keńeıtý baǵytynda tıisti sharalar qabyldanyp jatyr. Munyń barlyǵy elimizdiń dárilik qaýipsizdigin qamtamasyz etedi. Prezıdentimiz halyqqa Joldaýynda atap ótkendeı, ónimdi tereń óńdeýdi kózdeıtin jobalarǵa basa mán berý kerek. Sondyqtan jaı ǵana «orap-qaptaýdan» bas tartyp, dárilik zattar men medıtsınalyq buıymdar óndirisiniń tolyq tsıklin jolǵa qoıý strategııalyq mindetke aınalýǵa tıis, — dedi Oljas Bektenov.
Onyń aıtýynsha, farmatsevtıkalyq jobalar boıynsha ınvestıtsııalyq kelisimder jasaý jáne jer telimderin bólý — bul aýqymdy istiń basy ǵana.
Endigi kezekte olardy naqty júzege asyryp, jańa óndiris oryndaryn qurýǵa jáne qoldanystaǵy óndiristerdi keńeıtýge myqtap kirisý qajet.
— Budan bólek, dárilik zattardyń taǵy da bes júzge jýyq túrin shyǵarýdy qolǵa alyp, 1 200-den astam turaqty jumys ornyn qurý qajet bolady. Otandyq dárilerdiń túrlerin kóbeıtý, syrttan ákelinetin ónimderge táýeldilikti azaıtý baǵytynda jumysty jalǵastyrý kerek. Ońtaıly baǵany qalyptastyrý da — mańyzdy máseleniń biri. Sondaı-aq dárilik zattardyń sapasy men qaýipsizdigin basa nazarda ustaǵan jón. Emdelýshiler dári-dármekterdiń sapasyna tolyqtaı senimdi bolýǵa tıis. Keıbir preparattardyń jaǵymsyz keri áseri týraly azamattardyń shaǵymdaryn Densaýlyq saqtaý mınıstrligi únemi qadaǵalap otyrýy kerek, — dedi Úkimet basshysy.
Buǵan deıin habarlanǵandaı, búgin Úkimet otyrysynda Memleket basshysynyń bıylǵy 28 qazandaǵy «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýyn iske asyrý jónindegi jalpyulttyq is-sharalar josparynyń» jobasy maquldanyp, tıisti qaýly qabyldandy.
