Shtangishiler aldaǵy jarystarda dopıngpen ustalmaýy tıis - Týrızm jáne sport mınıstri
ASTANA. Tamyzdyń 9-y. QazAqparat /Gúlmıra Álıakparova/ - Búgin, QR Týrızm jáne sport mınıstri Temirhan Dosmuhanbetov, aýyr atletıka boıynsha el bapkerlerimen bolǵan kezdesýinde, aldaǵy jarystarda sportshylarymyzdyń dopıngpen ustalýyna jol bermeý qajettigin tapsyrdy.
Keńes barysynda T.Dosmuhanbetov, qazaqstandyq sportshylardyń álemdik deńgeıdegi sońǵy jarystarda kórsetken jetistikteri, budan bylaı olarǵa degen nazardy arttyratynyn aıtyp, bul bedeldi aldaǵy ýaqytta da ustap qalý úshin, sportshylar dopıngpen ustalyp qalmaýy tıistigin tapsyrdy.
«Bir qumalaq bir qaryn maıdy shirtedi. Eger quramanyń bir múshesi ustalsa, bútin komandanyń álem chempıonaty men Olımpıada oıyndaryndaǵy bolashaǵyna balta shabyldy degen sóz», - dep atap ótti ol.
Mınıstr, aýyr atletshiler men olardyń bapkerleriniń qajymas eńbeginiń arqasynda jetken jetistikter «dopıngtiń kómegi arqasynda boldy», degen jalǵan aıyptar taǵylmas úshin, bul máseleni Ulttyq quramanyń keńesshi-bapkeri Enver Týklerıge jiti qadaǵalaýda ustaýdy tapsyrdy.
«Biz bir kezderi dopıngtiń kesirinen velokomandamyzdy joǵalttyq. Ony áreń degende qazir ǵana qaıta aıaǵyna turǵyzdyq. Esesine, úsh jyl ýaqytty joǵalttyq. Bizdiń komanda (red. - aýyr atletshiler) myqty ekendigin bári biledi. Sondyqtan kez-kelgen ýaqytta dopıngke tekseris jasaýy múmkin», - dedi mınıstr.
