Shirkeý basshysy shoqyný merekesi kúnderi saqtyq sharalaryna shaqyrdy

AQTAÝ. KAZINFORM – Aqtaýda shoqyný merekesi kúnderi sýǵa túsý oryndary 4-shaǵynaýdanda uıymdastyrylady. Bul týraly qaladaǵy Blagoveşenskıı shirkeýiniń basshysy, protoıereı Sergeı Ponıch aıtty.

Sýǵa túsý dinı rásimi «Uly muhıt» dep te atalady. Ol 18-19 qańtar kúnderi ótedi. S.Ponıchtiń aıtýynsha, adamdarǵa arnaıy daıyndyq qajet emes. Bıyl muz oıyqtary 4-shaǵynaýdandaǵy teńiz jaǵalaýynda jasaldy.

«Mereke álemniń 145 memleketinde toılanady. Bul kúni sýǵa túsken adam barlyq kúná men syrqattan aıyǵady degen senim bar. Shirkeý qyzmetkerleri de osy merekeni asyǵa kútedi. Aldyn ala daıyndyqty talap etpeıdi. Degenmen, shoqyný merekesinde muzdaı sýǵa túsetinder úshin saqtyq sharalary qarastyrylǵan», – dedi Sergeı Ponıch.

Tótenshe jaǵdaılar departamenti eki kún boıy sýdaǵy qaýipsizdikti qamtamasyz etedi. Málimetke súıensek, adamdar sýyq sýǵa túspes buryn deneni jylytyp, fızıkalyq jattyǵýlar jasap alýy kerek. Yńǵaıly, taıǵanaq emes jáne tez sheshiletin aıaq-kıim qajet. Sondaı-aq aǵza muzdap ketpeý úshin sýda 1 mınýttan artyq turýǵa bolmaıdy. Shomylǵannan keıin súlgimen súrtinip, jyly, qurǵaq kıim kıip, ystyq shaı ishken jón. Sýǵa sekirýge jáne baspen súńgýge, spırttik ishimdikter ishýge jáne mas kúıinde sýǵa túsýge, júrek-tamyr aýrýlary bar adamdarǵa muzdaı sýǵa kirýge tyıym salynady.

Mańǵystaý oblysy Tótenshe jaǵdaılar departamenti halyqtyń qaýipsizdigin qamtamasyz etý úshin sharaǵa 32 adam, 8 tehnıka jumyldyrmaq.