Shrı-Lankanyń jaǵalaýy júk kemesindegi apat saldarynan qaýipti qoqysqa tolyp qaldy
NUR-SULTAN. QazAqparat – Shrı-Lanka tarıhynda eń úlken ekologııalyq apatty bastan keshirip jatyr. Eldegi tanymal kýrorttardyń jaǵajaılary MV X-Press Pearl júk kemesindegi órt saldarynan mıkroplastıkke tolyp qaldy, dep habarlaıdy QazAqparat Euronews-ke silteme jasap.
Júk kemesi 25 tonna azot qyshqylyn, natrıı gıdroksıdi men basqa da qaýipti hımıkattardy, sondaı-aq plastık paketter jasaýǵa arnalǵan shıkizat bar 28 konteınerdi tasymaldap bara jatqan. Mundaı shıkizat teńiz janýarlaryna qaýipti.
Jergilikti turǵyndarǵa qoqysty ustamaý kerektigin eskertti, óıtkeni ol óte ýly bolýy múmkin. Oqıǵa ornynan 50 mıl radıýsta balyq aýlaýǵa tyıym salyndy. Tazartý jumysyna qorǵanys quraldaryn kıgen myńdaǵan áskerı qyzmetshi jumyldyryldy.
Sıngapýrda tirkelgen keme Úndistannyń Gýdjaratynan Kolomboǵa bara jatqan. Ol 20 mamyrda Shrı-Lanka jaǵalaýynda órtenip ketip, qazir Kolombo astanasynan 9 mıl qashyqta zákir tastap toqtady. Jalyndy tolyǵymen sóndirý múmkin bolmady. Órt sóndirýshilerdiń jumysyn mýsson jelderi kedergi keltirýde.
Keme kapıtany men bas ınjeneri – reseılikter, al kapıtannyń kómekshisi – úndistandyq. Úsheýinen de tergeýshiler jaýap aldy. Qazirgi málimet boıynsha, kapıtan azot qyshqylynyń tógile bastaǵany týraly keme Shrı-Lankanyń aýmaǵyndaǵy teńiz bóligine kirmeı turyp bilgen. Bul órttiń shyǵýyna azottyń tógilýi sebep bolǵan dep boljanady.
Bılik konteıner tasymaldaýshy keme ıeleri men onyń komandasyn sotqa berip, shyǵyndy óteýdi talap etpek.
