Shrı-Lankanyń 1,6 mln. turǵyny - musylmandar - Amana bank limited Sri Lanka Basqarýshy dırektory
ALMATY. 18 qyrkúıek. QazAqparat - 2011 jyly iske qosylǵan alǵashqy ıslam banki «Amana bank»-tiń Shrı-Lankanyń bank sektory aktıvindegi úlesi 3 paıyzdy quraıdy.
Ony qarjy ınstıtýtynyń Basqarýshy dırektory jáne Bas dırektory Faızal Salıe búgin Almatyda ótip jatqan «Islamdyq qarjy boıynsha halyqaralyq otyrys: ońtaıly jaǵdaılar jasaý» dep atalatyn alqaly jıynda aıtty.
«20 mıllıony halqy bar Shrı-Lanka turǵyndarynyń 69 paıyzy býdda dinindegiler,al 8 paıyzy - musylmandar. Jalpy ishki ónimi 49 mlrd. dollardy quraıdy. Ol jan basyna shaqqanda 2375 dollardan keledi. 2016 jyly ony 4 myń dollarǵa jetkizý josparlanýda. Bank sektoryndaǵy 25 banktiń 12-si - sheteldik, ekeýi - memlekettik, bireýi ıslamdyq qarjy ınstıtýty», - deıdi F.Salıe. Onyń aıtýynsha, ıslamdyq qarjylandyrýdy damytýǵa qolaıly jaǵdaı jasalǵan bul eldiń tájirıbesi ózge eldergi úlgi-ónege bola alady. Halyqtyń ıslamdyq qarjylandyrý boıynsha saýatyn ashyp, belsendiligin oıatý maqsatynda onda ımamdar juma namazynan keıin jınalǵan jamaǵatqa úgit-nasıhat júrgizgen. Al tuńǵysh ıslam bankiniń negizin qalaǵan ıslamdyq kompanııalar boldy. Olar birneshe jyl boıy tynymsyz jumys jasaǵan soń ǵana alǵa qoıǵan maqsattaryna qol jetkizdi.
