Shrı-Lankadaǵy ekstremaldy aýa raıy saldarynan qaza tapqandar sany 607-ge jetti

ASTANA. KAZINFORM — «Dıtva» tsıklony týdyrǵan qolaısyz aýa raıy saldarynan Shrı-Lankada qaza tapqandar sany 607 adamǵa deıin ósti. Bul týraly juma kúni eldiń Tabıǵı apattarǵa qarsy kúres ortalyǵy habarlady, dep jazady Sınhýa.

Ortalyqtyń dereginshe, taǵy 214 adam habar-osharsyz ketti dep tanylǵan. Tabıǵat apaty el boıynsha 586 464 otbasynan quralǵan 2 mıllıonnan astam adamǵa áser etken. 4164 úı tolyq qıraǵan, al 67 505 úı jartylaı zaqymdanǵan.

Sonymen qatar, Shrı-Lankanyń meteorologııa departamenti 9–11 jeltoqsan aralyǵynda eldiń keıbir aımaqtarynda soltústik-shyǵys mýssondary saldarynan jaýyn-shashynnyń kúsheıýi múmkin ekenin eskertti.

Shrı-Lankanyń Qurylys jáne zertteýler jónindegi ulttyq uıymy da Kandı, Kegalle, Kýrýnegala, Matale jáne Nývara-Elııa okrýgterindegi birqatar aýdandarǵa kóshkin qaýpine baılanysty 3-deńgeıli erte eskertý jarııalady.

Budan buryn Shrı-Lankada sý tasqyny saldarynan 334 adam qaza tapqanyn jazǵanbyz.

Sonymen qatar Shrı-Lankada tabıǵı apattarǵa baılanysty elde tótenshe jaǵdaı engizildi.