Shrı-Lankada jaǵaǵa shyǵyp qalǵan 100-den astam kıt qutqaryldy
NЬıÝ-DELI. QazAqparat – Shrı-Lankanyń ÁTK teńizshileri men jergilikti turǵyndar jaǵajaıǵa shyǵyp qalǵan 120-ǵa jýyq kishkentaı kıtterdi ólimnen qutqardy. Bul oqıǵa Pandýra qalasynyń mańyndaǵy araldyń ońtústik-batys jaǵalaýynda oryn alǵan, dep habarlaıdy QazAqparat Reuters agenttigine silteme jasap.
Bastapqyda tek áskerı qyzmetshilerdiń kúshimen júrgizilgen qutqarý operatsııasyna ondaǵan jergilikti turǵyndar qosylǵan. Shrı-Lankada koronavırýsqa baılanysty túngi komendanttyq saǵat rejımine qaramastan, adamdar qutqarýshylar tobyna qosylyp, kıtterdi muhıtqa jetkizdi.
Keıbireýler taqtaı jáne taǵy basqa da sýda qalqıtyn materıaldardy paıdalanyp, kıtterdi jaǵadan alyp shyqty. «Qutqarý sharalary ótken túni boıy toqtaýsyz jalǵasty, – dedi Shrı-Lanka ÁTK-niń resmı ókili kapıtan Indıka de Sılva jýrnalısterge. – Biz 100-120 shaqty kıtke kómek kórsete aldyq. Ókinishke oraı, olardyń úsheýin qutqara almadyq».
Jyl saıyn álemniń ártúrli aımaqtarynda jaǵalaýǵa, ádette jaǵajaılarǵa 2 myńnan astam kıtter men kıt tárizdiler otrıadynyń basqa da ókilderi shyǵyp qalady. Olar kóbinese sýsyzdanýdan óledi.
