Shrı-Lankada tabıǵı apattarǵa baılanysty tótenshe jaǵdaı engizildi
ASTANA. KAZINFORM – Shrı-Lanka prezıdenti Anýra Kýmara Dıssanaıake sońǵy jyldardaǵy eń aýyr tabıǵı apattardyń biri saldarynan elde tótenshe jaǵdaı rejımin engizdi, dep habarlaıdy Sınhýa.
Prezıdent úkimetke búkil el aýmaǵynda tótenshe erejeler engizý jóninde qosymsha ókilettikter berdi. Resmı tulǵalardyń aıtýynsha, mundaı sheshim qoǵamdyq qaýipsizdikti qamtamasyz etýge, ulttyq turaqtylyqty saqtaýǵa jáne nóser jańbyr, sý tasqyny, laı kóshkini men qatty jelden zardap shegip otyrǵan aımaqtarda áreket etýdi jedeldetýge baǵyttalǵan.
Shrı-Lanka polıtsııasy arnaıy operatsııalar bólimshesin quryp, ony polıtsııanyń bas ınspektory tikeleı qadaǵalaıtynyn málimdedi. Qutqarý qyzmetine turǵyndar telefon arqyly nemese WhatsApp messendjeri arqyly júginýi úshin jedel jeliler iske qosylǵan.
El boıynsha jedel áreket etý toptary jasaqtaldy. Qajet bolǵan jaǵdaıda birden qoldaný úshin qaıyqtar, súńgýirlerge arnalǵan jabdyqtar jáne basqa da qutqarý quraldary daıyndaldy.
Tótenshe jaǵdaı kezinde úılestirilgen áreketterdi qamtamasyz etý úshin tabıǵı apattarmen kúres ortalyǵy, qarýly kúshter jáne ózge de qurylymdar jumyldyrylǵan.
Sonymen qatar, kóship-qoný jáne kóshi-qon qyzmeti qolaısyz aýa raıy saldarynan reısteri toqtatylyp, elden shyǵa almaı qalǵan sheteldikter úshin vızalyq rejımdi jeńildetti.
28 qarashada nemese odan keıin elden ketýi tıis bolǵan azamattar vıza uzartý alymynan jáne merzimin ótkizip alǵany úshin aıyppuldan bosatylady. Týrıstik, iskerlik jáne rezıdenttik vızasy bar sheteldikterge qajetti rásimderdi aıaqtaý úshin jeti kúndik jeńildik merzimi berildi.
Aıta keteıik, keshe Shrı-Lankadaǵy kóshkin men sý tasqyny 47 adamnyń ómirin qıǵany habarlandy.