Shrı-Lankada sý tasqyny saldarynan qaza tapqandar sany 334-ke jetti
ASTANA. KAZINFORM — Jergilikti ýaqyt boıynsha jeksenbi kúni saǵat 18:00-ge deıin Shrı-Lankada qolaısyz aýa raıy saldarynan qaza tapqandar sany 334 adamǵa jetkeni habarlandy. Bul týraly Lankadaǵy Tótenshe jaǵdaılarmen kúres ortalyǵy málimdedi, dep habarlaıdy Sınhýa.
Ortalyq málimetinshe, kem degende 370 adam habar-osharsyz ketti dep eseptelip otyr. Nóser jańbyr, sý tasqyny jáne sel jalpy sany 1 118 929 adamǵa, 309 607 otbasyǵa zardabyn tıgizip otyr.
Tótenshe jaǵdaıǵa baılanysty Shrı-Lanka Bilim mınıstrligi óz qaramaǵyndaǵy barlyq ýnıversıtetter, joǵary oqý oryndary jáne kásibı bilim berý ortalyqtarynyń oqý úderisin 8 jeltoqsanǵa deıin toqtatatynyn jarııalady.
Bul sheshim keń kólemdi kólik toqtaýlary, zaqymdanǵan ınfraqurylym jáne qolaısyz aýa raıynyń týdyratyn qaýipteri saldarynan qabyldanǵany atap ótildi.
Eske sala ketsek, 26 qarashada Shrı-Lankadaǵy kóshkin men sý tasqyny 47 adamnyń ómirin qıǵanyn jazǵanbyz.
Kóp uzamaı atalǵan elde tabıǵı apattarǵa baılanysty tótenshe jaǵdaı engizildi.
Keshe Memleket basshysy Qasym-Jomart Toqaev Shrı-Lanka prezıdentine kóńil aıtý jedelhatyn joldady.