Shrı-Lankada qoqys órtenip, 20 adam mert boldy
ASTANA. QazAqparat - Shrı-Lanka astanasynyń soltústik shyǵysynda janyp jatqan qoqystyń qulaýy saldarynan 20 adam mert boldy. Bul týraly TASS Kolombo polıtsııasyna silteme jasap habarlaıdy.
Quqyq qorǵaý organy ókilderiniń málimetterinshe, osy jumada bıiktigi 91 metr bolatyn birneshe myń tonna janyp jatqan qoqys úıindisi qulaǵan Kolonovala aımaǵyndaǵy qutqarý jumystary aıaqtaldy. Otqa oranyp, keıinnen tútindep jatqan aımaqta qalǵan kúldiń astynan 21 adamnyń máıiti tabyldy. Taǵy úsh adam iz-túzsiz joǵalǵandardyń qatarynda. Alaıda olardy tirideı taýyp alý neǵaıbil bolyp otyr, 40-tan astam adamdy kúıik shaldy.
Kolombonyń ulttyq aýrýhanasynyń baspasóz hatshysy Pýshpa Soıstiń sózinshe, osy oqıǵadan zardap shegip, atalmysh aýrýhanada jatqan eki adamnyń jaǵdaıy múshkil. Tonaý áreketteri oryn alyp jatqany týraly habardy alǵan soń polıtsııa qyzmetkerleri qaıǵyly jaǵdaı oryn alǵan aımaqta kúzetti kúsheıtip, moroderlyq jasady degen kúdikpen 18 adamdy tutqynǵa aldy.
145 úı qırap, taǵy júzdegen qurylystarǵa zaqym keldi, qırandylardy arshý jumystaryna 400-den astam áskerı qyzmetkerler qatysýda. 600-den astam adamǵa osy aýdandaǵy memlekettik mektepten baspana berildi.
Jergilikti saıasatkerlerdiń aıtýynsha, el parlamentiniń ókilderi jýyrda ǵana Kolonnavadaǵy 23 tonna qoqystyń jaqyn mańdaǵy adamdardyń ómiri men densaýlyqtaryna aıtarlyqtaı qaýip týdyryp otyrǵandyǵy jóninde aıtqan.
Olardyń sózderinshe, bolǵan oqıǵa tabıǵı apat emes,bılik basyndaǵy azamattardyń salaqtyqtarynyń saldarynan bolǵan tehnogendik katastrofa. Kúnine bul aımaqtaǵy qoqys ornynan 800 tonna qaldyqtar tógilip kelgen. Turǵyndar bolsa atalǵan oryndy ózge jerge kóshirý nemese ony jabýdy talap etip, birneshe márte narazylyq sharalaryn uıymdastyrǵan.
