Shrı-Lankada 112 kg esirtki tasymaldaǵan 22 monah ustaldy

ASTANA. KAZINFORM – Shrı-Lanka áýejaıynda júkterinen 110 kg kannabıs tapqan jıyrma eki monah qamaýǵa alyndy, dep habarlaıdy Daily Mirror. 

Esirtkige qarsy kúres bıýrosynyń qyzmetkerleri topty 25 sáýir kúni keshke Shrı-Lanka astanasyna Taılandtan kelgen kezde ustady.

Alynǵan aqparat negizinde áreket etken qyzmetkerler top tasymaldaǵan júkti tekserip, jasyryn bólimderinde shamamen 112 keli esirtkini anyqtady. 

Bul Shrı-Lanka astanasyndaǵy Bandaranaıke halyqaralyq áýejaıynda tárkilengen eń iri partııa boldy.

Onyń naryqtaǵy quny shamamen 3,5 mln dollarǵa baǵalandy.

Tergeý barysynda trafıkti úsh monah uıymdastyrǵany, olar áleýmettik jeliler arqyly taǵy 19 adamdy tartqany anyqtaldy. Habarlanǵandaı, top 22 sáýirde Taılandqa shyqqan. 

Shrı-Lanka polıtsııasynyń Esirtkige qarsy kúres bıýrosy el boıynsha ǵıbadathanalardaǵy keıbir monahtardyń uıaly telefondarynan olardyń kúndelikti kıimmen demalyp jatqan fotosýretteri men beınelerin anyqtady. 

Jas monahtardyń kópshiligi 30 jasqa tolmaǵan jáne áli de joǵary oqý oryndarynda bilim alyp júr. Qolda bar málimet boıynsha,olar tegin áýe bıletteri, turý jáne tamaqtaný ýádelerimen tartyldy. Shamalanǵandaı, olarǵa mektep oqýshylaryna arnalǵan «oqý materıaldary men táttilerdi» tasymaldaıtyndary aıtyldy. 

Alaıda polıtsııa ár sómkeden shamamen 5 kg esirtki anyqtady. 

Tergeý barysynda sondaı-aq toptyń ótken aıda 12 monahtyń qatysýymen osyndaı operatsııa jasaǵany jáne jaqyn arada taǵy bir sapar josparlaǵany anyqtaldy. 

Osyǵan deıin Shaolın ǵıbadathanasynyń bastyǵyna qatysty tergeý amaldary bastalǵany habarlandy.