Shrı-Lanka jaǵalaýynda munaı sýpertankeri órtenip jatyr
KOLOMBO. QazAqparat – Beısenbi kúni Shrı-Lankanyń shyǵys jaǵalaýynda munaı sýpertankeri órtendi. El bıligi munaıǵa toly keme jaǵaǵa qaraı qalqı bastaǵannan keıin ony tirkep, súıreýge kiristi. Bul týraly QazAqparat Reuters agenttigine silteme jasap habarlaıdy.
2 mıllıonǵa jýyq barrel munaıdy tasymaldaǵan New Diamond tankerindegi órt áli basylmaı jatyr. Tanker bortynda ekıpajdyń 23 múshesi bolǵan, olardyń bireýi qaza tapty, qalǵandary qutqarylǵan.
Kemeden munaıdyń aǵyp ketý belgileri anyqtalmaǵany habarlandy. Órtti sóndirýge Reseı áskerı-teńiz kúshteri men Úndistannyń jaǵalaýdaǵy kúzet kemeleri qatysyp otyr.
Beısenbi kúni tańerteń tankerdiń mashına bóliminde bastalǵan órt kemeniń Indian Oil Corp (IOC) (IOC.NS) (Úndistan memlekettik munaı-gaz kompanııasy) saqtandyrylǵan minbesine aýysqan.
Áýelde keme Tırýkkovıl qalasynan shyǵysqa qaraı 38 shaqyrym jerdegi qaırańda qalǵan. El bıligi tankerdi tirkep shyǵysqa qaraı, jaǵadan alystaý jerge súıreı bastady.
Tırýkkovıl – Shrı-Lankanyń Ampara aýmaǵyndaǵy qalasy. Jaqyn jerde búkil álemge tanymal serfıngshilerge arnalǵan Arýgam-Beı ornalasqan.
Aldyn ala boljam boıynsha, teńizshilerdiń biri qaza tapty. Ekıpaj quramynda Grekııanyń 5 azamaty men Fılıppınniń 18 azamaty bolǵan. Ekıpaj músheleriniń biri jaraqat aldy.
Kemeniń Kýveıttegi Mına-Ál-Ahmadı kemejaıynan shyǵyp, Úndistannyń Paradıp kemejaıyna baǵyt alǵany atap ótiledi.
