Shrı-Lanka jaǵalaýynda qaýipti júk tıelgen sıngapýrlyq keme órtenip jatyr
NЬıÝ-DELI. QazAqparat – Shrı-Lanka sýlarynda, Kolombodan 14 mıl jerde, Sıngapýrdyń jalaýyn kótergen X-Press Pearl konteıner kemesindegi 20 mamyrda bastalǵan órt jalǵasýda. Keme bortynda syıymdylyǵy 25 tonnalyq azot qyshqyly, plastmassa jáne hımıkat toly 1486 konteıner bar, dep habarlaıdy QazAqparat Daily Mirror gazetine silteme jasap.
Basylymnyń habarlaýynsha, Úndistannyń jaǵalaý kúzetiniń úsh kemesi, Shrı-Lanka Áskerı-teńiz kúshteriniń bir kemesi jáne birneshe jeke keme jalyndy oqshaýlaýǵa tyrysýda. Órt sóndirýge arnalǵan materıaldar áskerı tikushaqtan X- Press Pearl kemesine tastalýda. Buǵan Eýropadan sársenbide jetkizilgen arnaıy tehnıka qoldanylyp jatyr. Bılik jergilikti balyqshylarǵa teńizge shyqpaýǵa keńes berdi.
Júk tasýshy keme álemdegi eń iri jalpy maqsattaǵy júkterdi tasıtyn teńiz tasymaldaýshylarynyń biri X-Press Feeders kompanııasyna tıesili.
25 adamnan turatyn X-Press Pearl ekıpajyndaǵylar evakýatsııalandy. Olardyń ishinde Reseı, Úndistan, Qytaı jáne Fılıppın azamattary bar. Daily Mirror gazetiniń habarlaýynsha, eki teńizshi aýrýhanaǵa jatqyzyldy.
Konteıner kemesindegi órt 20 mamyrda bastalǵan. Bir kúnnen keıin qatty jeldiń áserinen kemede órt kúsheıe tústi. Saldarynan X-Press Pear bortynda jarylys bolyp, korpýsy bólshektenip ketti.
