Shrı-Lanka Úkimetiniń basshysy Qazaqstanda eki kóligin 1 mlrd teńgege saqtandyrdy
ASTANA. QazAqparat - Qazaqstandyq saqtandyrý kompanııalarynyń biri Shrı-Lanka premer-mınıstrine tıesili Mercedes-Benz S 600 markaly eki avtokólikti saqtandyrý mindettemesin moınyna aldy, dep habarlaıdy QazAqparat Elorda Info portalyna silteme jasap.
«Kólikterdiń qunynan bólek onyń ereksheligi, avtomashınany ıesi tap bolýy múmkin barlyq qaýip-qaterlerden saqtaý qajettiginde. Osyǵan baılanysty saqtandyrý somasy árbir kólik úshin 570 mln.-ǵa jýyq teńgeni qurady», - delingen kompanııanyń taratqan habarlamasynda.
«Mercedes-Benz S 600» - mersedesterdiń altynshy býyny. Ol kóptegen elektronıkalarmen óte yńǵaıly etip jasalǵan. Kólikte kenetten týyndaǵan kedergi aldynda shuǵyl toqtaý júıesi bar. Sondaı-aq úsh ese úlkeıtip kórsetetin navıgatsııa, joldy lazermen skanerlep, onyń bederine yńǵaılanatyn Magic Body Control júıesi qamtylǵan. Oryndyqtar jolaýshyǵa barynsha jaılylyqty qamtamasyz etedi. Onyń massaj jasaıtyn fýnktsııasyn aıfon arqyly basqarýǵa bolady. Al beldikke jolaýshy soqtyǵysý kezinde onyń astynan syrǵyp túspes úshin qaýipsizdik jastyqshasy ornatylǵan.
Atap ótilgendeı, qazaqstandyq saqtandyrý kompanııasynda buǵan deıin Frankfýrt avtosalonynda usynylǵan Ferrari 458 Italia, Brýneı memleketiniń hanzadasyna tıesili LaFerrari, úndi aktrısasy jáne 2000 jylǵy álem arýynyń Rolls-Royce Wraith kóligi saqtandyrylǵan.
