Shrı-Lanka túrmesindegi tártipsizdikten 25 adam qaza taýyp, 100-den astamy jaralandy
ASTANA. KAZINFORM — Shrı-Lanka túrmeleriniń birinde bolǵan qaqtyǵys saldarynan keminde 25 adam qaza taýyp, 100-den astam adam jaraqat aldy. Qaza bolǵandardyń tórteýi túrme kúzetshileri, dep habarlaıdy Euronews.
Bılik ókilderiniń málimetinshe, bul – sońǵy bes jyldan astam ýaqyttaǵy eń iri túrme tártipsizdigi.
Polıtsııanyń habarlaýynsha, eki esirtki qylmystyq tobyna qatysy bar sottalǵandar arasyndaǵy túngi qaqtyǵystan keıin zardap shekkender Negombo qalasyndaǵy aýrýhanaǵa jetkizildi.
Aýrýhana dırektory Pýshpa Gamlat medıtsınalyq mekemege 25 adamnyń máıiti jetkizilgenin, sondaı-aq 100-den astam jaralanǵan sottalǵan men kúzetshige medıtsınalyq kómek kórsetilip jatqanyn aıtty.
Resmı málimetke sáıkes, jappaı tóbeles jeksenbi kúni keshke 10 myńǵa jýyq adam qamaýda otyrǵan Negombo túrmesinde bastalǵan.
Oqıǵa ornyna polıtsııanyń arnaıy jasaǵy shaqyrylǵanymen, olar túrme aýmaǵyna kirgen joq.
Dúısenbi kúni túrme aldyna sottalǵandardyń týystary jınaldy. Jergilikti turǵyndar atys dybystaryn estigenderin aıtyp, bılik jaǵdaıdy baqylaý úshin ushqyshsyz ushý apparattaryn paıdalanǵan.
Eske salsaq, 2020 jyldyń jeltoqsanynda Shrı-Lankanyń taǵy bir túrmesinde bolǵan tártipsizdik kezinde 11 sottalǵan qaza taýyp, 117 adam jaralanǵan edi. Ol kezde COVID-19 pandemııasynyń sharyqtaý kezeńinde túrmelerdiń shamadan tys tolýyna baılanysty bılik júzdegen adamdy merziminen buryn bosatqan.
Qazirgi ýaqytta Shrı-Lankanyń penıtentsıarlyq júıesi kúrdeli jaǵdaıda qalyp otyr. Syıymdylyǵy 10 myń adamǵa eseptelgen túrmelerde búginde 39 myńnan astam adam qamaýda otyr. Bul belgilengen normadan shamamen tórt ese kóp jáne zorlyq-zombylyq pen narazylyqtardyń jıileýine sebep bolyp keledi.
