Shrı-Lanka Prezıdenti Qazaqstannyń gýmanıtarlyq kómegine alǵys aıtty

ASTANA. QazAqparat - Shrı-Lanka Prezıdenti Mahında Radjapaksa Qazaqstannyń Elshisi Dýlat Qýanyshevty dıplomatııalyq mıssııasynyń aıaqtalýyna baılanysty qabyldady, dep habarlady Qr Syrtqy ister mınıstrliginiń baspasóz qyzmetinen.

19 qyrkúıekte bolǵan kezdesý barysynda taraptar eki el arasyndaǵy ózara yqpaldastyqtyń damýyn, ásirese, 2012 jyly QR Prezıdenti Nursultan Nazarbaevtyń shaqyrýymen M.Radjapaksanyń Astanaǵa resmı saparynan keıingi qatynastardyń tereńdeýin atap ótti.

2013 j. Shrı Lankanyń Azııadaǵy ózara yntymaqtastyq jáne senim sharalary týraly Keńeske baıqaýshy mártebesin alýy asa mańyzdy bolyp tabylady, óıtkeni bul jaıt Azııadaǵy dıalogtyń odan ári damýynyń jáne qurlyqtyq qaýipsizdik júıesiniń qalyptasýyna yqpal etedi.

Elshi D. Qýanyshev Qazaqstannyń 2017-2018 jyldary BUU Qaýipsizdik Keńesine turaqty emes múshe bolý nıeti týraly habarlady, Shrı Lanka Prezıdenti bul másele boıynsha qazaqstandyq taraptyń alǵa tartqan dálederin oń baǵalady. Áńgime ústinde D.Qýanyshev M.Radjapaksany Astanada ótetin EKSPO-2017 kórmesine daıyndyq týraly da habardar etti.

QR Prezıdenti N.Nazarbaevtyń halyqaralyq bastamalarynyń mańyzdylyǵyna nazar aýdara otyryp, M.Radjapaksa Qazaqstan tarapynyń Shrı-Lankadaǵy jer silkinisine baılanysty joldaǵan gýmanıtarlyq kómegi úshin alǵysyn bildirdi.