Shrı-Lanka eks-prezıdenti memlekettik qarajatty maqsatsyz paıdalandy degen aıyppen tutqyndaldy

ASTANA. KAZINFORM — Shrı-Lanka polıtsııasy burynǵy prezıdent Ranıl Vıkramasıngheni prezıdenttik kezinde memlekettik qarajatty talan-tarajǵa salǵany úshin tutqyndaldy, dep jazdy Kazinform tilshisi agenttigi Associated Press-ke silteme jasap.

2023 jyly Vıkramasınghe G77 sammıtinen Kýbadan qaıtar jolda Ulybrıtanııaǵa aıaldaǵan. Sol kezde ol jubaıymen birge Výlverhempton ýnıversıtetinde dıplom tapsyrý rásimine qatysqan.

Eks-prezıdent bul sapar barysynda jubaıynyń barlyq shyǵynyn ózi kótergenin jáne memlekettik qarajat paıdalanylmaǵanyn alǵa tartyp otyr.

Alaıda Shrı-Lanka Qylmystyq isterdi tergeý departamenti (CID) bul jeke saparǵa baılanysty barlyq shyǵyn, onyń ishinde oqqaǵarlardyń shyǵyny da memlekettik bıýdjet esebinen tólengenin málimdedi.

Burynǵy prezıdent el astanasy Kolombo qalasyndaǵy magıstrattyq sotta uzaqqa sozylǵan tyńdaýǵa qatysyp, 26 tamyzǵa deıin qamaýǵa alý týraly sheshim shyǵaryldy.

Sot ǵımaratynyń aldynda Vıkramasıngheniń tutqyndalýyna narazylyq bildirip, onyń jaqtastary jınaldy.

Eks-prezıdent shetelge 23 ret sapar shegip, olardyń jalpy shyǵyny 2 mıllıon dollardan asqan.

Bul – Shrı-Lanka tarıhyndaǵy burynǵy prezıdentke qatysty alǵashqy tutqyndaý.

76 jastaǵy Vıkramasınghe Shrı-Lanka prezıdenti qyzmetin 2022 jyldan 2024 jylǵa deıin atqardy jáne oǵan deıin alty ret premer-mınıstr laýazymynda bolǵan.

Ol prezıdenttikke eldegi ekonomıkalyq kúızelis saldarynan oryn alǵan saıası daǵdarystan keıin keldi. Sol kezde eldiń burynǵy prezıdenti Gotabaıa Radjapaksa 2022 jyly otstavkaǵa ketken edi.

Vıkramasınghe bılikke kelgennen keıin eldegi ınflıatsııa tómendep, ulttyq valıýta nyǵaıyp, valıýta rezervteri artty. Alaıda onyń úkimeti Halyqaralyq valıýta qorynyń kómegi aıasynda engizilgen qatań únemdeý sharalary – salyqtardyń jáne kommýnaldyq tólemderdiń kóterilýi saldarynan qoǵamdyq narazylyqqa tap boldy.

Buǵan deıin Kolýmbııanyń burynǵy prezıdenti 12 jyl úı qamaqqa alynǵany týraly habarlaǵan bolatynbyz.