Shirigen ónimdi anyqtaıdy: Astanalyq stýdent aýylsharýashylyq dronyn oılap tapty
ASTANA. KAZINFORM – Astanadaǵy Lý Ban sheberhanasynda bilim alyp júrgen tórtinshi kýrs stýdenti Berik Qanatbek aýyl sharýashylyǵy ónimderin avtomatty túrde suryptaıtyn qurylǵy ázirledi. Jas ónertapqyshtyń jobasy shirigen jáne pisken ónimderdi ajyratyp, qol eńbegin azaıtýǵa baǵyttalǵan. Qazir stýdent qurylǵyny synaqtan ótkizip jatyr, al bolashaqta ony óndiriske engizý josparlanǵan.
Joba avtory qurylǵyny jasaý barysynda baǵdarlamalaý, robototehnıka jáne óndiristik jabdyqtarmen jumys isteý boıynsha alǵan bilimin paıdalanǵan.
Onyń aıtýynsha, qurylǵyny jetildirý jumystary áli de jalǵasyp jatyr.
– Stýdentterimiz munda baǵdarlamalaý tilderin úırenýmen qatar, robottar men óndiristik tehnıkany kúndelikti turmysta, óndiriste, jeke kásibin damytýda jáne elimizdiń basqa da óndiris salalarynda qoldanýdy meńgeredi, – dedi sheberhana jetekshisi Altaıbek Mamyr.
Injener Nurbolat Ahmetjanovtyń aıtýynsha, bilim alýshylar meńgeretin daǵdylar tek drondy basqarýmen shektelmeıdi.
– Stýdentterimiz aldymen sımýlıatorlarda jumys isteýdi úırenedi. Odan keıin drondardy basqarýǵa kóshedi. Olar drondardy basqaryp qana qoımaı, qurylǵylardan alynǵan málimetterdi tsıfrlyq taldaý arqyly ıntellektýaldy sheshim qabyldaýdy da meńgeredi, – dedi ınjener.
Drondardy aýyl sharýashylyǵynda paıdalaný da qarastyrylǵan. Bul úshin qurylǵynyń baǵyty men jumys tártibi aldyn ala baǵdarlamaǵa engiziledi.
– Aldymen egistik aýmaǵynyń koordınattaryn engizemiz. Sodan keıin dron operatordyń qatysýynsyz egistikke dári shashady. Qýaty azaıǵan kezde dron ózi belgilengen ornyna qaıtyp keledi. Biz onyń akkýmýlıatoryn aýystyryp, dárisin toltyryp, qaıta iske qosamyz. Osydan keıin dron toqtaǵan jerine baryp, jumysyn jalǵastyrady. Osyndaı baǵdarlamalardy stýdentterimiz ózderi jazýdy úırenedi, – dep túsindirdi Nurbolat Ahmetjanov.
Aıta keteıik, mundaı ortalyqtar qazir Astana, Almaty jáne Óskemen qalalarynda jumys isteıdi. Sheberhananyń negizgi maqsaty – stýdentterdiń teorııalyq bilimin tájirıbemen ushtastyryp, robototehnıka men tsıfrlyq tehnologııalardy naqty mindetterdi sheshýde qoldana alatyn mamandar daıarlaý.
